LUILEK01 - Dit is van dat edele lant van Cockaengen

DIT IS VAN DAT EDELE LANT VAN COCKAENGEN
Die neringhe is menigherande
Die men doet in allen landen
Om dat lijf mede te belegghen.
Nu hoert, ic sal wat gesegghen.
Ick quam laesten in een lant
Dat my vreemt was ende onbekant.
Ghi sult horen wonder groot
Wat God den luden daer geboot:
In dat lant altoes te sijn
Sonder arbeit ende sonder pijn.
Het is dat lant van Cockaengen
Die een helft is beter dan al de Spaengen,
Dander helft dan al Petouwen,
Want men heeft daer wil van schonen vrouwen.
Dat lant maeckte die heilige geest,
Want wie tlangste slaept die heeft meest.
In dat lant doet niemant werck,
Is hij out, ionck of sterk.
Daer sijn die tuyne gemaeckt met worsten,
[...]
Die vensteren ende die dueren
Sijn ghemaeckt van salm ende stueren,
Die stander, die in den huse staen,
Sijn al van carbonckel sonder waen,
Die balcken, die in den huse liggen,
Sijn al gemaeckt van boterweggen,
Daerom sijn die zolderplancken oeck
Ghemaeckt van claren peperkoeck.
Bancken ende stoelen
Sijn al ghebacken van roffiolen.
Haspelen, spinrock ende sulcke dinghen
Sijn af geflochten van crakelinghen,
Die latten sijn palinghen ghebraden
Ende die huse sijn gedeckt met vladen.
Die tuyne, die op den velde staen
Die sijn geflochten sonder waen
Uit groten, schonen lamperyen
Daer op dansen ende reyen
Ende lopen hasen ende conijnen,
Wilde herten ende euerswijnen.
Dese mach men vanghen metter hant
Ende leyden ewech sonder bant.
Daer sijn oeck rossen ende rossijden,
Ghedeckt met kostelicken gesmijden.
Wilt hy seer drauen, houwen of lopen,
Die en darf hy tegen nyemant kopen.
Dit is dat lant dat God mint,
Die daer t langste slaept, diet meeste wint
Ende wat men in dat lant vint legghen
Dat mach eyn yeghelick op nemen sonder segghen
Ende doen daer mede sijn bederuen,
Recht of waer sijn eyghen erue.
Schoen kleder sijn daer oeck goetkoop,
Want voer allen huseren lichter een hoep,
Ende daertoe hosen ende schoen.
Die wil die mackse aendoen.
In allen straten vint men gespreit
Schoen tafelen, die men nyemant wederseit
Met witten laken onbeflect,
Broet ende wijn daer op geset,
Ende daertoe vissche ende vleysche
Elkerlijc nae sijnen heysche.
Men mach daer eten ende drincken al den dach,
Daer en geldt nyet ghelach
Als men hier te lande doet.
O dat lant is al soe goet!
Want het regent .iii. werf sdages vladen,
Palingen ende pasteygebraden.
Men vint van alles ghenoech,
Elck mensche nae sijn gefoech.
Daer en blijft nyemant onberaden,
Want die gansen gaent hem seluen braden,
Visch, vleysche ende vette capoenen
Koecken hem selven tot allen noenen,
Ende die vette voghelen mede.
Het is daer des lants sede.
In dat lant loept een riuier
Van goeden wijn en bier.
Aen beyden sijden van den oeuer
Ligghen silueren schaelen ende coeuer
Ende een luttel vort loept klaereyt,
Muscatel, romenie, die men nyemant wederseit.
Daer mach een yegelijck drincken sonder kost,
Wilt hij wijn, bier of most.
Met gingfer, met noten muschaten
Sijn daer ghemaect die straten
Ende met pellen overhangen,
Dat men daer onder mach gangen.
Daer is een goede costume int lant:
Nyemant en is daer des anderen vyant,
Elck is daer des anderen vrient,
Die hem gern helpet ende dyent.
Dit lant is lanck ende wijt,
Ende is daer altoes somertijt,
Recht oft ware in den april
Daer en heeft nyemant sijnen onwil.
Ende daer en mach nyemant yet ontbreken.
Elck maent heeft vijf weken,
En de .iiii. paeschen sijn daer int iaer
Ende vier pinxten dat is waer,
Ende .iiii. kersdagen te waren
Ende enen vasten binnen hondert jaren.
Noch is daer een ander duecht
Daer elck mensche is af verhuecht:
Daer en roept wijf noch man,
Die den anderen gheweygeren kan
Om een frientelijck slapen gaen,
Dat segghe ick v al sonder waen.
Daer sijn trompen ende scalmeyen,
Daer sij nae dansen ende reyen.
Schone vrouwen ende ioncfrouwen
Die mach elck hebben al sonder trouwen,
Sonder sonde ende sonder scande.
Het is daer die sede van den lande.
Dat segghen si, die van daer comen
Dat lant en mach niet te vol wonen.
Hieromme rade ick allen elckijnen
Die noede arbeyten ende pijnen
Ende gerne eten ende drincken veel
Ende gerne driven lodderspeel,
Dat sij hier laten staen
Ende in dat rijck lant gaen.
Daer en comt nyemant, des sijt vroet,
Die anders enich ambocht doet
Dan eten ende drincken allen den dach
Ende des auents borgen haer ghelach
Ende noede voor haren dach betalen
Ende altijt putten ende palen
Wie sij quijt mogen gaen.
Hier mede wil ickt laten staen
Ende wille laten dese woort,
Op auentuur wie sy hoort.
Amen.
(P. de Keyser: 'De nieuwe reis naar Luilekkerland', in: P. de Keyser: Ars folklorica Belgica. Noord- en Zuid-Nederlandse volkskunst. Antwerpen [enz.] 1956, p.33-36)

AT 1930 - Schlaraffenland    AT 1930 - Schlaraffenland   

ATU 1930 - Schlaraffenland.    ATU 1930 - Schlaraffenland.   

Opsomming van de heerlijkheden in Luilekkerland.

P. de Keyser. De nieuwe reis naar Luilekkerland. in: P. de Keyser: Ars folklorica Belgica. Noord- en Zuid-Nederlandse volkskunst. Antwerpen [etc.] 1956. p. 33-36

15e eeuw

Er zijn twee teksten: een tekst Londen die slechts deels bewaard is, en een tekst Brussel die compleet is. Beide teksten zijn bewerkingen van het Franse C'est li fabliaus de Coquaingne. Tekst van De Keyser steunt op Brussel, maar is omgespeld naar Londen.
Onder Beeld het schilderij Luilekkerland van Pieter Brueghel.

Schlaraffenland

Cockaengen    Cockaengen   

Luilekkerland    Luilekkerland   

Spaengen    Spaengen   

Petouwen    Petouwen   

God    God   

Heilige Geest    Heilige Geest   

Paeschen    Paeschen   

Pasen    Pasen   

Pinxten    Pinxten   

Pinksteren    Pinksteren   

Kersdag    Kersdag   

Kerst    Kerst   

Vasten    Vasten   

Spanje    Spanje   

Poitou    Poitou   

2013-03-01 14:46:20