LUILEK09 - Dit is van dat edele lant van Cockaengen

Dit is van dat edele lant van Cockaengen
DIe neringhe is menigherande,
Die men doet in allen lande
Om dat lijff mede t'ondraghen.
Hoert, wat ic u sal ghewaghen!
5 Ick quam laesten in een lant,
Daer ic vreemt was ende onbekant.
Nu moechdi horen wonder groot,
Wat God den luden daer gheboet:
In dat lant te wesen ende te sijn
10 Sonder arbeit ende sonder pijn!
Dit wort den luden wel bacant.
Sach ye man beter lant
Dan dat lant van Cockaengen?
Die helft is beter dan al Spaengen,
15 D'ander helft is beter dan Betouwen.
Men heft er wil van schonen vrouwen.
Dat is 't lant van den Heiligen Gheest.
Wie daer lancst slaept, de wint meest.
Daer en derf nyemant doen werck,
20 Out, jonck, cranc of sterck.
Der en mach nyemant yet gheborsten.
Die wanden sijn daer ghemaect van worsten.
Daer sijn die veynsteren ende doren
Ghemaect van salmen ende van storen.
25 Die tafelborden sijn struven in pannen,
Van bier sijn ghemaect die kannen.
Die platelen, die in den huse sijn,
Sijn van fijn guldijn.
Dat broet al schoen ter wijn,
30 Alsoe claer als die sonnenschijn.
Die balken, die daer in den huse leggen,
Sijn ghemaeckt van boterwegghen.
Haspelen, spinrocken ende alsulke dinghen
Sijn ghebacken van crakelinghen.
35 Daer sijn die bancken ende stoelen
Ghebacken al van roffiolen.
Daer sijn die soldreplancken oeck
Ghebacken van claren pepercoeck.
Die latten sijn palinghen ghebraden.
40 Die h[uise sijn gedeckt mit vladen],
Die s[yn geflochten, sonder waen].
Daer [lopen hasen ende conynen],
Wil h[erten ende everswynen]
Van w[?]
45 Die ma[ch men vangen mitter hant].
Sach o[yt iemant beter lant]!
Want sch[oen kleyder syn daer oeck goitkoep].
Voer elke de[ur licht er eyn hoep],
Elkerlijc na [synen sin].
50 Daertoe kous [ende schoen]:
Die wil, die m[aech se aendoyn],
Al waer hi ridd[er ofte knecht].
Daer vint men tot [allen straeten gespreit]
Schone tafelen, die m[en nyemant wederseit].
55 Eten, drincken mach m[en alle den dach],
Daer en derf nyemant gh[even ghelach],
Als men hier ten lande doet.
Och, dat lant van Cockaengen is so [goet]!
Het reghent daer in allen hoecken
60 Vladen, pasteyen ende pannekoecken.
In dat lant loept een ryvier
Van goeden wijn, van goeden bier,
Muscadel ende oec clareyt,
Romeny die men ontseit.
65 Die mach men drincken goeden cost,
Wilt men wijn of wil men most.
Mit ghenghever ende mit muscaten
Sijn ghemaect aldaer die straten.
Veel ghels is daer goet tijt.
70 Daer en draecht men hat noch nijt,
Soe wat men daer in 't lant vint legghen,
Dat neemt men sonder wedersegghen
Ende doet daermede sijn bederve,
Recht of 't waer sijn eyghen erve.
75 Het is daer altijt of 't waer meye
Daer singt elc voghel sijnre leye.
Daer coemt in die maent vijf weken
[?] niet ghebreken
[Ende .iiij. Paes]chen in't jaer,
80 [Ende vier Pinxte]ren daernaer
[?]nte Jans misse
[?] ghewissen
[Ende .iiij. Kersdag]he, dat is waer,
[Ende eynen va]sten in hondert jaer
85 [?] mer enen halven dach
[?] nye beter lant en sach.
[Noch is dae]r een ander doecht,
[Daer elck myn]sche by is af verhoecht.
[In d]at lant loept een Jordane
90 [?] en die daer quamen
[?] men dat water in haren mont
[?] ouden alle worden jonc,
[Re]cht of sy waren van twintich jaren.
[D]at seg ic u voerware.
95 Daer sijn trompen ende scelmeyen,
Daer sy op dansen ende op reyen,
Ende driven vroechden sonder ghetal.
Ick hoep 't hem ewelic duren al.
Soe wie dat daer coemt in Gods namen,
100 Die mach voerwaer wel segghen: Amen.
(Herman Pleij: Dromen van Cocagne. Middeleeuwse fantasieën over het volmaakte leven. Amsterdam 1997, p.38-44.)

AT 1930 - Schlaraffenland    AT 1930 - Schlaraffenland   

ATU 1930 - Schlaraffenland.    ATU 1930 - Schlaraffenland.   

In Luilekkerland kan men de hele dag luieren: het voedsel en de drank staan altijd klaar. Er is een verjongingsbron. De huizen zijn er van eetwaar gemaakt. Dieren bieden zich gewillig aan om opgegeten te worden. Voor niets hoeft betaald te worden. Als het regent, dan vallen er vlaaien en pannenkoeken. Een rivier bevat louter wijn. Er zijn veel meer feestdagen dan normaal.

Herman Pleij: Dromen van Cocagne. Middeleeuwse fantasieën over het volmaakte leven. Amsterdam 1997, p.38-44.

15e eeuw

Het afschrift is van rijmtekst L (Londen, Brit. Libr. ms. Add. 10286).

Schlaraffenland

Luilekkerland    Luilekkerland   

Cockaengen    Cockaengen   

God    God   

Heilige Geest    Heilige Geest   

Pasen    Pasen   

Pinksteren    Pinksteren   

Kerstmis    Kerstmis   

Sint-Jansmis    Sint-Jansmis   

Cocagne    Cocagne   

Spanje    Spanje   

Betuwe    Betuwe   

Jordaan    Jordaan   

2013-03-01 14:46:20