ACORN0205_0207_12198 - Geheimzinnige ontmoeting in de "doorne Bilk"

Da was men grotmoeder eur tante die ’t beleefd êt. ’t Mêns weunde op d’Eie o je da wit zien, dat is tegen ’t Sparrebos van Klemskerke tegen ’t Sparrebos van den Oane. En ze weunde zie doa op ’n klèèn doeniengsje en eur vint was a joaren ziek. En ze zegt: “’t Is Dunderdag, ‘k moen no de mart” en ze kiekt no d’orloge; ja ja ten achten kroop ze der in. Mo ze kom zie wakker. “Tiens” zeg se “’t is vüve”, mo ten was gin vüve z’aa miszien. En da was azo ’n oederwetsche sliengerarloge, zo’n bak. Ze doet eur kloar, ze was twi euren te vroeg of drie euren, ze pakt eur manden mi butter, woamee dasse no de mart most en ze trap et of. En ’t was êlf kilometers verre van an d’Eie toe an de mart van Oostende. Mor osse nu an ’t begun van de Doorne Bilk komt van den ander kant gunter van an Brènienge aal se eur pottenoster boven lik of dan aal d’oede mênschen dein, en ze goenk an ’t bidden lik of dan aal de mênschen dein, de joenge zêlve oan ze deur den Doorne Bilk mosten surtoe in den doenkerten. Z’en is ter nog gin vüf menüten in, in de Doorne Bilk en da was ’n smolle zanweg mid a weeskanten oge dorens en je koste nie vluchten, je koste nie over die dores, deur dores ’n ka je nie vluchten en achter en voren kos je niet zien da woaren aal kroenkels - en ze ziet doar ’n zwarte gedoante ofkommen in dien bilk. Ze zeg “Wat is dadde? Is dat ’n koeie die losgebroeken is?Mo da trappelt nie, ‘k en oren niet. Wa soe da zien? En ’t mênschje stoen toa dood van schrik enne ze blüfd ‘e bitje stoan en die gedoante kom noader en ze ziet dat ’t mênschen zien. “Goddomme” zeg se “mo dat is toch noois gin vüve” zeg se “’k zien ik zeker te vroeg. Ke zien ik gin bewegienge en anders komt er e karre verbie die nor de mart riedt, van e boer, ken ên ik nog niet gezien. En wa toe da volk ier, ‘k go me gon vluchten” zeg se. Ze wild eur ommedroaien voe te vluchten me se stoa glik an de groend genageld, z’is lik versteven van schrik. Intusschentied kommen die mênschen noader. Ze zie si twi mênschen, die e klèèn lirtje dragen op euder schoere en ’t lig toar ’n doon op en ter kom toarnog ’n ander man neffest med e spaa in zen anden en z’aan lêezen an, ze zaag da ta vrimde mênschen van e schip woaren en z’aan azo ’n schippersmutse an, etwoa van ’n driemaster. En da mêns ’n kost nie mi veroeren en eur buttermanden an eur oarme blèven angen ze’n aa ’t gedach nie van ze nere te zetten. En de mênschen die zèèmannen giengen eur verbie enne kèken eki nor eur en ’t zei niemand gin woord en ze woaren verbie. Mo ’t wüvetje va so dasse were toe eur zêlven kwam zettet op e lopen nor Ostende. Van ’t zêlfs osse ’n tiedetje gelopen was ze kost nie mi. Mo osse nu tend’oasem an de brugge van Foenseke’s kwam da was wo da de Barkedèène nu is, osse doa kwam die brugge over stoen ze ton voo de poorte. En ze zag dat tie poorte gesloten was en zeg se: “’k Sien ik algliek gemist” zeg se “’k sien ik veelst te vroeg”. En ’t mênschje zet eur doa nere op die bolken die doar altied lagen, voe poalen voer an ’t oofd te werken. En osse doar e hèèle tied gezeten êt, dein de wachten de poorte open, ’t was ton nog mo zesse os de poorte opengienk. En ze gienk no de mart en ze verkocht eur butter lik gewente en ze ziet doar e persoon of twèè dasse kent en ze vertelde dadde. En ’t zeg èèn van a gunter mê ze karre en ze pêerd: “Kom Moeie” zegten “kom mee mê mien, wan je ziet ter echt verschrikt üt, je ziet ter echt nie goed van.” Z’is meegegoan en z’ên de zelfste dag nog moeten de dokteur alen en zes weken loater was ze dood, van schrik. En da was mie grotmoeder se tante.

SINSAG 0478 - Andere Erlebnisse; unbeschreibbare Spukerscheinungen.    SINSAG 0478 - Andere Erlebnisse; unbeschreibbare Spukerscheinungen.   

Een vrouw woonde samen met haar zieke man in Klemskerke. Op een dag ging de vrouw vroeg slapen omdat ze de volgende ochtend met boter naar de markt moest. De vrouw werd 's nachts wakker en vertrok per vergissing twee of drie uur vroeger naar de markt in Oostende. Zodra de vrouw bij de Doorne Bilk kwam, haalde ze haar paternoster boven en begon te bidden, zoals alle mensen op die plaats deden. Plots zag de vrouw tot haar grote schrik een zwarte gedaante aankomen. De vrouw kon niet vluchten, want ze was aan de grond genageld van angst. Er kwamen twee mannen aan, die een kleine ladder droegen, waarop een dode lag. Een derde man droeg laarzen en had een spade in zijn hand. Zwijgend liepen de drie mannen het bange vrouwtje voorbij. Toen de vrouw bij de brug kwam en vaststelde dat de poort nog dicht was, besefte ze dat ze veel te vroeg was opgestaan. De vrouw bleef daar wachten tot om zes uur de poort werd opengemaakt. De vrouw was zo geschrokken van de nachtelijke gebeurtenis dat ze zes weken later gestorven is.

A. Cornelis, Gent, 1958

1.4 Luchtgeesten

west-vlaams (kust)

174

Tante van de grootmoeder van de informant

fabulaat

Doorne Bilk    Doorne Bilk   

Oostende    Oostende   

Oostende    Oostende   

Doorne Bilk    Doorne Bilk   

Doornen Blik (bij Bredene)    Doornen Blik (bij Bredene)   

Klemskerke    Klemskerke