MVAND0176_0177_14016 - Zolang de bril van de heks in huis is zitten er vlooien

’t Kwaam ’n wuuf ip ’t hof me garen en lintjes en m’aan wieder niet nodig en ze zei: “Koop je niet, je gaat nog ip mien peizen” en ze goengk voort. ’n Tiedje nadien viendt moeder ’n brilletje do buuten an ’t portje voe no den bilk te gaan, do zè an da paaltje! Vader probeerde ‘t ’n kè en je zag ’t ie do stief goed mee. Da was ’n brilletje met ’n zilveren monturtje, oedewets van model wè. De zelfsten dag zaten wieder dikkevul van de luuzen. ‘k Giengen ik tonne no de Zozefienen en moeder vroeg an de nunne da ze mien ’n ander plekke zoe geven in ’t schole omda da joengk neffenst mien in de klasse verzekerst nie proper was. Mo da was ollemolle dadde nie want thuus kokten z’alle dagen onze kleren uut en wa da wieder kamden of kuusten, da bleef gedeuren. ’t Ende raad giengk moeder no de paters van Steenbrugge, want peist dat al dat afkoken geen werk mee briengt de! Mo de paters kosten dor al nie vele an doen en me peisden wieder ons zot en me begosten wieder dat ip dien bril te steken want m’aan wieder al an al die ip ’t hof kwaam gevraagd o da soms underen bril nie was, mo ’t wist niemand van waar dat dat uutkwaam. Toe da me ip da wuuvetje begosten te peizen want achterna gezien, was da toch lik ’n aardig wuuvetje azo lik me die kappe en dat aanzichte. En moedr pakte da brilletje o ze de zaterdag no Brugge giengk, en z’et dor entwaaran d’Ezelpoorte in ’t water gesmeten en ’t was sebiet gedaan me de luuzen. Ge meugt da zwak geloven wè want da’s gebeurd in ’t jaar tweeëntwientig o kik nog no ’t schole giengen.

SINSAG 0580 - Andere Hexenkünste    SINSAG 0580 - Andere Hexenkünste   

Op een boerderij kwam een vrouw leuren met lintjes en garen. Omdat niemand iets kocht, zei de vrouw: "Als je niets koopt, dan zal je nog aan mij denken!" Een tijdje later vond de boerin bij een paaltje op het erf een bril met een zilveren montuur. De boer zette de bril op omdat hij er goed kon door zien. Nog diezelfde dag zaten alle bewoners van de boerderij vol luizen. Omdat de paters van Steenbrugge niet konden helpen, gooide de boerin de gevonden bril in het water. Daarna was iedereen van de luizen verlost.

M. Vander Cruysse, Leuven, 1965

2.1 Heksen

west-vlaams (n van brugge)

430

1922

memoraat

Zuienkerke    Zuienkerke