MNIJS0117_0119_19162

Ewel, ze geloofden nie al an spoken, nin’s, mo wit je wa dadde, je zoe do nu zeggen, je gelooft do nie in, mo’k go je nu e kir e geval vertellen: m’en dat hier hèt in Gistel; ze zeggen, Ameliete Teute, zein me wieder altend, ‘k èn z’ik genoege gekend. (…)De kienders Halewijck, ze stoenden zieder mè drie grote zwoare merriepèèrden, zwoare pèèrden, en da was ton nog ten tiede van dien daschmachiene. Zieder woaren hier de grote baas, van die daschmachiene nor ol die boeren hier te voeren. Da was ton mor een die da dei en os (als) die daschmachiene moste verzet zien, aja, da woaren ol postjes van e pèèrd (boerderijtje met maar één paard), die menschen ze kosten do niet an doen ee. Zieder vervoerden die daschmachine no ’t unders (hun boerderij) en van ’t unders no do, en ze dein zieder heel dien hoek. En ze woaren bezig met die daschmachine te verzetten, - ze goeng(en) met die daschmachien, ‘k èn dat ook hoaren vertellen wei (hoor), me dienkt danze domee ni dienges goeng(en), no… no Charel Djoens. – Zodus, ze woaren bezig met die machiene achter de boane te vervoeren en Amelie Teute kwaam do, da ze do gewandeld kwam. En ze zeggen: "nè Amelie is do!" De menschen ken heur ol ee, ’t was Miele die ’t herte aat van te zeggen tegen heur: "Amelie, wèèr je (haast je), dat je d’er moste oender geraken, je zie zo plat of e klute!" "Wadde," zeg ze, "zo plat of e klute! Past mor goed ip, da j’hier altemets (soms) met die daschmachine in de gracht nie riedt!"Mo verdorie, tien meter verder, heel die bazar in de gracht. ’t Was gin mens die ’t wiste hoe dat ’t gegoan was ee, gin mens! ’n Dor euren gewrocht en dat is woa, euren èn ze do gewerkt voe die daschmachine dor uut dien dienk te kriegen met die drie zwoare pèèrden. Toe zelfs schieven gebruukt, da do niet uut kriegen. "Wel", zei Amelie, "die drie pèèrden kunnen da do noait uutkriegen, ’t is mor een die da kut uuttrekken, en da’s Miene Du met heur muls (muilezels)."Mo Miene aa nu mor een muul. Mo Geldhof aat ton nog e muul ee, en die muuls lagen tegoare."’t Is mor een die da kan," zeg ze, "en dat is Miene Du." En ze begosten zieder dat te geloven en ze gieng zieder achter Miene Du. En Miene kwaam, met heuren hoed an en met die zakschorte an, zo zwart of de moar van de stove, of ’t gat van die moar do, en met die twi muuls. En zeg ze, zeg Miene: "Kom," zeg ze tegen een van die Halewijck’s, "me gon der e keten bieleggen en ‘k gon helpen trekken."Die drie zwoare pèèrden met die twi muuls dobie kregen da do nog nie uut ee, "’t is gin avaance", zeg Amelie, "da j’under dor an trekt", zeg ze, "’t zien mo die twi muuls allene, zeg ze, "die da do kunnen uuttrekken!" En ze lein die drie pèèrden of en die muuls trokken die daschmachine dor uut. Die twi muuls allene.

SINSAG 0541 - Hexe lässt Wagen vom Deich (Weg) fallen    SINSAG 0541 - Hexe lässt Wagen vom Deich (Weg) fallen   

In Gistel woonde vroeger een heks.
Een boer die een grote dorsmachine bezat, voerde de machine met drie sterke merries van de ene boerderij naar de andere. Op die kleine boerderijtjes had men maar één paard. Op een dag was de boer samen met enkele mannen zijn dorsmachine aan het vervoeren, toen men in de verte de heks zag aankomen. De boer sprak tot de heks: "Pas maar op, want als je hier onder geraakt, ben je zo plat als de grond!" De heks reageerde geërgerd en antwoordde: "Letten jullie maar op dat die dorsmachine niet in de gracht belandt!" Tien meter verderop viel de dorsmachine in de gracht. Op alle mogelijke manieren probeerde men de drie merries de machine uit de gracht te doen trekken, maar het lukte niet. De heks sprak: "Er is maar één persoon die dat kan". Ze noemde de naam van een vrouw iemand die muilezels had. Uiteindelijk ging de boer die vrouw halen. De vrouw kwam met haar twee muilezels aangelopen. Ze droeg een hoed en een vuile schort. De drie paarden en de twee muilezels samen kregen de dorsmachine niet uit de gracht. "Dat lukt niet", zei de heks, "je moet de muilezels alleen voor de dorsmachine zetten". Toen men dat deed, was de dorsmachine onmiddellijk uit de gracht.

M.-R. Nijsters, Leuven, 1969

2.1 Heksen

west-vlaams (nw van houtland)

53.4

fabulaat

Gistel    Gistel   

Gistel    Gistel