MDESC0129_0130_15117 - Priester doet brand ophouden

Ja, ‘k adde ik e maot, je klapt daovan oltements e keeje, eneeje, d’n een gast of d’n ander’n kiek, ’t wos Jim, kiek, ‘k gaon ’n noem’n, wi.Enne, Jim, en ’t wos daovan oek eklapt, dat e priester, wanneer da ’t brandt, eu, de wiend ku doen ker’n, dat d’n brand ol d’ander kant gaot, dan de verder gebouwieng’n toen, ezo nie meeje in gevaor zien, eneeje. Enne, ‘k zegg’n ik ezo teg’n Jim, ‘k gelov’n da Duvenootje dat nog edaon adde - maor en is dood -, die paster wos up Rinnegelst. J’e nog, e j’ nog oord van Duvenootje? Je moet’n pertank nog ewet’n ên, wi. En is iej, djuuste d’n paster vor pastertje Denies, die nog, dat oed pastertje van twiëntneg’ntig jaor, dien Moorsleenaore, eneeje. Ewel, ik vertelde oeke dat d’n paster, dat Duvenootje dat nog edaon adde, paster Duvenootje, ja. “Jamao, ‘k zegg’n teg’n Jim, ‘k zegg’n, ‘k wos er ik nie biej, wi, ‘k zegg’n, ‘k wet’n nie, wi, ‘k zegg’n, ik ên dat oek ezo or’n vertell’n”. “Tomme”, zeg Jim, “’k gaon dat e keeje vraog’n nao menere dienge”, och, die nu weg is, en is oek in Moorsleej, nuw; nè, d’n kaplaon waomei da Jim ’t stief goed dei, e j’ nooit or’n klapp’n van dien kaplaon? E dei ’t gruwelik goed mi d’n dien van Waotoe, e kaplaon van Waotoe, en e dei ’t stief goed dermei. En Jim zegt: “’k Gaon ’t vraog’n teg’n dien kaplaon”. ’k Zegge’n: “Ja, ‘k zegg’n, vraog giej dat, a j’ giej dat wilt, ‘k zegg’n, ott’n ’t gao will’n zegg’n”! Nuw, Jim vraogt dat ezo derteg’n. “Hm”, zegt’n, “e ja”, zegt’n, “dat zien ol dieng’n die verteld zien, eneeje”, zegt’n. “’k Wet’n ik nie oe ’t waor is. Mao”, zegt’n, “kiek, ‘k moet’n ol zegg’n lik of dat is”, zegt’n, “’t wos oek e keeje e brand”, zegt’n, “ier in Waotoe, in Waotoe, wi, gebeurd. En ze kwam’n oek, de mensch’n”, zegt’n. En ‘k most’n ik dao gaon lez’n, eneeje, ze wild’n oek dank’ ik, dank de wiend dei draoi’n, eneeje. ‘k Goenk ik”, zegt’n en ‘k ên ik daor elez’n. En oe dat nu e toeval, of wuk da dat is”, zegt’n, “ik wet’n ik nie, wi”, zegt’n, mao de wiend ed edraoid”!

SINSAG 0750 - Andere Zauberei.    SINSAG 0750 - Andere Zauberei.   

Een man had horen vertellen dat pastoors bij een brand de vlammen konden tegenhouden zodat de gebouwen die nog geen vuur hadden gevat, gespaard bleven. Omdat de man wilde weten of dat waar was, ging hij om uitleg vragen bij de kapelaan. De kapelaan vertelde dat hij op een dag ergens was moeten gaan bidden, toen daar in de buurt een brand woedde. De mensen wilden dat de kapelaan de wind deed draaien. De kapelaan begon te bidden en even later draaide de wind inderdaad. Of dat nu toeval was of het gevolg van een goddelijke kracht, wist de kapelaan zelf niet.

M. Deschrijver, Gent, 1961

2.2 Tovenaars

west-vlaams (poperinge en omstreken)

274

fabulaat

Poperinge    Poperinge