ACORN0124_0124_12076 - Van de visser die moest pruimen

’t Was nu ekir e vintje en je gienk no z’n üs ê je most ’s anderdags no zèè goan. Ja da was ton ook op e reiz e mi de grote schepen, mi de sloepen da was ollemoale vèèrtien dagen, drie weken, da was ollemolle lange op zèè, ja deur dat da mi zilschepen was. E je goa nor üs ê je ziet doar e pakschen liggen en zegten: “’t Ligt doa glik e paksche, wat zoe da zien?” Je rapt da pakschen op ê je kiekt der in: “Wê” zegten “’t is ier èèn die ze rolletje toebak verloren êt, schiektoebak, ‘k gon ik da wel in me zak steken” zegten. “Dat is goed” voer on’k op zèè zien ewo. “Nu dat is goed, je stikt ie da stiksje schiektoebak in z’n zak en je goedie op zèè.“Ja” zegten “’t is woa ‘k ên ik nog e stiksje schiektoebak, ‘k gon ekir e prüme pakken” lik of aan ze zein. Enne je biet ie voavan en j’ê gèèl de raize, zo lank of da de raize gewist êt nie anders moeten doen of knauwen, nie anders.“Mo” zeggen ze “wat ei gie?”“Ewê, ‘k weet ik nie” zegten “’k en ik doa...” Zo nateurlik ee, je zei et wa da’t was, datten ie doa da rolletje toebak gevoenden ade en da ta nog splinternieuwe was, dat er nog niet aan gewist ade.Ewêl z’n ton otten ton binnengekommen is van de reize, ze zien der mee, ‘k weten nie o’t no de poaters is daan ze d’r mee gewist ên of nor de paster, mo ‘k geloven wel mèèr da’t no de poaters is, en z’en zieder em moeten belezen en ’t is ton weg gegoan.

Een visser vond op de vooravond van zijn vertrek een pakje tabak bij zijn deur. Toen de visser de volgende dag op zee was, begon hij op de tabak te kauwen. De man heeft de hele tijd niets anders moeten doen dan kauwen. Niemand wist wat er met hem aan de hand was. Zodra de vissers weer thuis waren, zijn ze met de man naar de paters geweest. Nadat de man was overlezen, was de betovering verbroken.

A. Cornelis, Gent, 1958

2.2 Tovenaars

west-vlaams (kust)

53

fabulaat

Oostende    Oostende