CDEWA0169_0170_16025 - Bespookte Hoeve x

’t Groot Ter Doest was’n gekende abdie. ’t Is ’n groate boerderie en ’n groate scheure en ’t is bekend vo Spookhof. Mien voader was van Lissewege. ’s Nachts ten twoalven spokteg het dor in die scheure. Ip zeker moment, no den twoalven, begost da spil: daschen met de vleie, schoanmaken… Da makteg ’n geruchte. Ze woaren mè velen an ’t werk, ol geesten … en geruchte!!! (Die scheure is zo groat dat er zeven groate boerenwagens met de langen diesel (stok tussen twee paarden) achter mekoar kunnen stoan.) ’t Wierd dor veel over gebabbeld. ’t Woaren do knechten die ip ’t hof bleven en d’arbeiders giengen nor huus en de zundag ip café. Ip ’n zundag nu vielen arbeiders en knechten samen in de café en ze vertelden van die toverie in de scheure. Een van die arbeiders zei: "Met ol junder flauwe trunten (met al jullie flauwigheden), ‘k zoen dan ’n ki willen zien”. De knecht zei ‘t erop: "’t Zoet toch gin een durven ipbluven ’s nachts in de scheure”. "Ja, wedden”? zei den arbeider. Ze wedden vor ’n roende pienten. Zo, dien vint kwam ’s avonds do no toe. De scheure was groat en lag vul vruchten. Nu en ton wierden d’er van die vruchten gemachiend. Je makteg hem ’n polk (kuil, nest, hol) met ’n deel van die boenden (bundels). Na twaalf uur, ’t spil begost… Ol da geruchte. Die vint dost nie kieken. Je geboarde dat ie sliep. Nu en ton kwam ’t er één van die geesten hem schudden en je geboarde van nieten. Achter verschillende keren kwam ’t er ene en j’hefteg hem omhoge toet in ’t hoogste van de scheure. Ze zeggen dat er do ’n viermasterhoet (zoveel hout als er nodig was voor ’n viermaster) in da dak zit. Ze lieten hem ton were zakken toet da polkstje. ’t Zweet barstte hem uut. Mo je geboarde nog oltied van nieten. Da’s toe driemaal toe gebeurd da’n z’hem in d’hoogte heften (hieven) en were lieten zakken. Tegen dat ’t in ’t kloare van de dag kwam, was olles gedoan. J’is ’t er levend uutgekommen. Volgende zundag woaren ze were toope en je vertelde z’n gevoarnissen (wederwaardigheden). "Wel, wel”, zei ’t ie… "’k èn woater en bloed gezwit van benauwdheid; je zoe nog meugen den helft van Lissewege geven, ‘k zoen ’t nie herdoen”.

SINSAG 0477 - Begegnung mit Geistern.    SINSAG 0477 - Begegnung mit Geistern.   

In de schuur van een boerderij in Lissewege spookte het om middernacht. Men hoorde dan veel lawaai dat door geesten werd veroorzaakt. In het kader van een weddenschap verklaarde een arbeider zich bereid om een nacht in de spookschuur door te brengen. Toen de spoken om middernacht verschenen, deed de arbeider alsof hij sliep. Tot driemaal toe tilden de spoken de man op tot tegen het plafond van de schuur. De man was doodsbang, maar hij hield zich stil. De volgende zondag vertelde de man aan de knechten met wie hij de weddenschap had gesloten: "Ik heb water en bloed gezweet van angst. Ook al zou je me de helft van Lissewege geven, dan nog zou ik zoiets niet opnieuw willen doen".

C. Dewaele, Leuven, 1967

1.4 Luchtgeesten

west-vlaams (oostkust)

228

Vader van de informant

fabulaat

Ter Doest (Lissewege)    Ter Doest (Lissewege)   

hoeve Ter Doest (Lissewege)    hoeve Ter Doest (Lissewege)   

Westkapelle    Westkapelle   

Lissewege    Lissewege