SPINR128 - Die evangelien vanden spinrocke

1200 ¶ Het xvi. capittel.
"Mijn vriendinnen, voer mijn slot ic u seggen moet een wonderlick
secreet, also vast naket den heiligen sondach, dat luttel
luyden weten. Ick segghe u dat die oyvaders, die hier comen
tsomers, ende des winters weder keeren in haer lant, dwelc is
1205 biden berghe van Synay, sijn in haer lant creaturen als wij
sijn. Ende het blijct oec wel dat sij verstant hebben, want si
betalen Gode altijt tiende van haren jongen." (Glose) Mits
desen soe rechte haer op vrou Breye, die wonderliken out was,
ende seide dattet waer was. Want si hadde dicke haren heer
1210 horen segghen, die geheeten was Claes van Triere, doe hi tot Sinte
Katerinen was ten berge van Sinay, so hadde hi bider sterften al
sijn geselscap verloren, ende al gaende doer die wildernisse, so
sach hi van verre eenen mensch totten welken hi ghinc, ende
begonst hem te vragen in Duytsche na den berch, ende hij weessen
1215 hem. Ende met dien so ghinc die mensche met hem, ende seide
hem van sinen staet. Ende dat hi herwerts over een oydevaer
was, ende maect sinen nest in Vlaendren op sijns ghebueren
huys. Claes, die dit niet ghelooven en woude, badt hem dat hi
hem doch een litteiken gheven wilde, op dat hi hem daer af
1220 dancken mochte, alsoe verre als hy ymmermeer wederom quame tot
sinen lande. Doe toechde die oydevaer eenen gulden rinck, die hi
in anderen tiden op dye plaetse daer in Vlaenderen geraept had,
ende also schiere als dien Claes sach, so kende hi hem. Want het
was den rinck daer hi, slap ghegordt, sijn wijf mede ghetrouwet
1225 had. Ende die oydevaer gaf hem den rinck weder op dye vorwaerde,
dat hij den verkenwachters ende dien coywachters van sinen
huse verbieden soude, datsi hem geen quaet meer en daden, also
si plaghen. Ende na desen nam mijn heerken orlof ende keerde
weder te Brugghe, daer hij na dien so wel leefde, dat hij wel
1230 .xiiij. palmen dicke was doen hi sterf.
¶ Hiermede was daer groot gelach onder dander, die al gereet
haer spillen af gehaspelt hadden, ende begonsten haer bagagien
te trossen, daer mi na verlangede, want my des wercx begonste te
verdrieten. Niet te min ic voechde mi met hem al lachende. Ende
1235 om orlof te hebben, so sette ic mi int gesichte van hemlieden.
Doe quamen tot mi dese ses vrouwen die gepresidereert ende
aldus gelesen hadden die evangelien, ende dancten mi herteliken
van mijnre moyten die ic angenomen hadde, ende geloefden mi,
begeerdicx, dat si mijn woert doen souden an eenige joncfrouwen,
1240 daer ic begeerde. Daer op ic antwoerde, soe men te seggen
pleecht: "Een paert dat alleen gaet te drincken, sonder datment
derf beriden, ende een man die ter kerken gaet met eenen stocke,
die hebben beide haer beste dagen leden." Ende van dien seidic
mi een te sijne.
1245 ¶ Conclusie.
Mijn heren ende vrouwen, wilt dit nemen voer een tijtcortinge.
Ende al ist, dat ghijs also nyet en bevint, dies en wilt den
vrouwen niet te wersser doen, want sijt sekerlic na haer best
gedaen hebben. Ende al en geloefdijs niet, ghi en blijft daerom
1250 niet onghelovich.

Elck pijnt hem wel tonthouwen.
Het is ter eeren vanden vrouwen,
Ende oec tAntwerpen gheprent.
1255 Elc wacht hem van veel betrouwen,
So en crijcht hi geen berouwen.
Men geeftet voer een present.

¶ Bi mi, Michiel van Hoochstraten.

Zaterdag, zestiende kapittel. Ooievaaiers die hier in de zomer komen, gaan in de winter naar Egypte, waar ze gewoon mensen zijn. Ze hebben ook verstand, want ze betalen rente aan God voor hun jongen.
Dit is het laatste kapittel. De vrouwen bedanken de schrijver. Als antwoord heeft hij nog een wijsheid in petto: een paard dat alleen gaat drinken omdat niemand hem durft te berijden en een man die met een stok naar de kerk gaat, hebben beide hun beste dagen gehad.

G.J.Boekenoogen (ed.): Die evangelien vanden spinrocke. 's-Gravenhage 1910 (facsimile)

ca. 1520

Synay    Synay   

[Midden-Oosten]    [Midden-Oosten]   

God    God   

vrou Breye    vrou Breye   

Claes van Triere    Claes van Triere   

Sinte Katerine [Sint-Katharina]    Sinte Katerine [Sint-Katharina]   

Nederlands    Nederlands   

Michiel van Hoochstraten    Michiel van Hoochstraten   

[Sinaï]    [Sinaï]   

[Egypte]    [Egypte]   

[Nederland]    [Nederland]   

Vlaanderen    Vlaanderen   

[België]    [België]   

Brugge    Brugge   

Antwerpen    Antwerpen   

2013-03-01 14:46:20