BRAND001 - Van Sente Brandane

VAN SENTE BRANDANE.
Nu verneemt, hoe over lanc
Een heere was in Yerlant,
Die sach menich Gods teekijn.
Wildi dies gheloovende zijn,
5 So hoort wonder, ghi heeren!
Die Heleghe Gheest moet mi leeren,
Die welke der ezelinnen
Wijlen dede sprekens beghinnen,
Daer up dat reet Balaam,
10 Dat was een heydin man,
Dat so meinschelike sprac,
Daer sij den inghel Gods sach
Commen in haer ghemoet:
Den wech hi haer wederstoet
15 Met eenen zwerde haer gaf de macht,
Datsi wert redene acht.
Een helich man was vierijn;
Si vloo van den inghel fijn
Ende dede haren heere cont.
20 Dese moete ontsluten minen mont:
Die ghene die sonder waen,
Gheheeten so was hi Brandaen,
Abdt was hi ende regement
Van IIIm moonken of daer omtrent,
25 Gheboren hute Yberne,
Gode diendi wel gherne.
Dese vant, int ondersoucken,
Bescreven in houden boucken
Van vele teekenen ons Heeren;
30 Hoort! hier moghedi leeren
Van den goeden Gods wijse,
Hoe dat twee paradijse
Boven der eerden waren;
Doe las hi voort te waren
35 Van vele wonders, datmer in vant
Ende menich groot eylant;
Ooc las de wijse heere,
Hoe dat eene weerelt weere
Hier onder dese eerde
40 Ende alst hier dach werde,
Dat daer dan nacht zye.
Hi las dat hemele waren drie;
Van visschen hi ghescreven vant,
Hoe dat een wout ende een lant
45 Ghewassen stont up zine zwaerde:
Dat wederseidi aerde,
Om datso onghelovich was.
Ooc las hi, hoe dat Judas
Gheniette Gods ontfaermichede
50 Ende hi ghenade hadde mede
Alle sondaghes nachte.
Hi en wilde no hi en mochte
Dies emmer niet gheloven,
Hi en saecht met zinen oghen.
55 Van toorne verberrendi den bouc
Ende gaf den scrivere eenen vlouc;
Dat becochti zint wel diere;
Daer hi stont bi den viere,
Daer die bouc in bernende lach,
60 Die inghel Gods hem toe sprac:
"O lieve vrient Brandaen,
Du heves evele mesdaen,
Dat over mids dinen toren
Die waerheit dus es verloren.
65 Nu laettene bernen daer inne:
Di wert noch wel in inne,
Wat waer ofte loghene es:
Di ontbiet Jhesus Kerst,
Dattu suls gaen varen
70 Up des zeewes baren
Al omme ende omme IX jaer;
Du sult bescauwen, wat es waer
Of wat loghene si mede."
Dat wart hem grote pijnlichede.
75 Dus galt hi den bouc
Ende leet omme dien vlouc
Wel meneghen grooten noot
Ende voer daert God gheboot.

De abt Brandaan leest veel over wonderlijke dingen. Hij wil alleen niet geloven wat er geschreven staat tot hij het zelf ziet en dus verbrandt hij zijn boek. Dan komt er een engel van God die hem vertelt dat hij een reis gaat maken. Tijdens de reis zal Brandaan erachter komen wat waarheid en wat leugen is.

E. Bonebakker (ed.), Van Sente Brandane, naar het Comburgsche en het Hulthemsche handschrift. Amsterdam, 1894.

1380-1425

De indeling van de tekst is overgenomen uit: De reis van Sint Brandaan. Een reisverhaal uit de twaalfde eeuw, W. Wilmink (vert.) en W.P. Gerritsen (inl.). Amsterdam, 1996.

Brandane    Brandane   

Brandaen    Brandaen   

[Brandaan]    [Brandaan]   

Yerlant    Yerlant   

God    God   

Heleghe Gheest    Heleghe Gheest   

[Heilige Geest]    [Heilige Geest]   

[Bileam]    [Bileam]   

Yberne    Yberne   

Judas    Judas   

Jhesus Kerst    Jhesus Kerst   

[Jezus Christus]    [Jezus Christus]   

Heere    Heere   

[Ierland]    [Ierland]   

Balaam    Balaam   

2013-03-01 14:46:20