Hoofdtekst
Exempel. Men leest van eenen goeden man, die seere wel leefde, ende hadde een wijf die hem ontstarf. De goede man bat neerstelic voer de ziele van sinen wive. Up eenen tijt vertoechdese haer haren man. Hij vraechde haer hoet met haer was. Sou seide: „Ic ben noch in groeter pinen, in groeter tribulacie". Ende sou seide: „Volcht mi!" Hij volchde haer. Sou leedene in een vreeselike plaetse, daer veel vianden waren. Ende daer was eenen put vul viers, daer een ijserin cupe up stont, een ijserin bac. Ende daer in gotmen ghesmolten lot ende coper. Ende men wierp daer eenen man in, dat een porter gheweest hadde, die hij wel ghekent hadde. Ende men wierper oec een wijf in, die hij oec wel kende. Ende sij soden ende walden oec in die cupe up ende neder, gelijc eerweten in de potte pleghen te siedene. Ende sij ghaven vreeseliken gheluut, ghecrijsch. Sou vraechde of hij dese liede wel kende. Hij seide; „jahij. Sou seide: „Sij sijn euwelic verdomt, ende moeten dit inder euwichcit lijden, om dat hij sijn huwelic brac ende met haer mesdede. Ende ic, seide sou, lijde so groete pine, om dat ie middelareghe was van hem beeden. Ic coppeldese te ghader, ende was een sake daer af. Maer ic hadde warachcich berau, eer ic starf. Ende ic en dede niet ghenouch penitencie. Alsoe moete ic vuldoen inden vagheviere". Doe seide de man: „Dese lieden hadden groet berau ende ontfinghen thelich sacrament eer sij storven". Sou seide: „Dat en profiteerde hem heden niet, want al dat sij daden sij deden huut vreesen om verdomt te sine, ende niet huut minne te gode waert.
Beschrijving
Een weduwnaar bad voor de ziel van zijn vrouw. Op een dag zegt zijn vrouw dat hij met haar mee moet gaan om te kijken hoe zij nu leeft. Zij leeft op een plaats waar veel duivels zijn met een put vol van vuur. De mensen die daar leven zijn eeuwig verdoemd. Alles wat deze mensen voor de dood deden was uit de vrees om verdoemd te worden en niet voor de liefde van God.
Bron
De Vooys, C.G.N., Middelnederlandse stichtelijke exempelen, Zwolle 1953, pagina 47-48
Commentaar
1463
Naam Overig in Tekst
God 
God 
Datum Invoer
2013-03-01 14:46:20