Hoofdtekst
Een exempel. Men leset van enen rechtverdighen mensche, die hed geern gheweten woe een guede siel scheiden vanden licham. Ende vander gehengenisse gads quaem hi tot eenre stede, daer een guet mensche lach op sine verscheiden, ende sach sin siel gaen wt sinen licham als een gulden duve, welck recht vloech mydden op dat licham, ende seide: ,,O lieve licham ende alre costelixste vat, mit orlof soe scheide ic van di, ende bedanck di grotelicken dattu myn siel, die god mit sinen dueren bloede gecocht heeft, in kuysbeit en in alre suverheit onthalden hebste". Daer nae vloech si op die ogen, ende op die ander lede, danckende hem dat si discyplyn ende guede seden gehalden hadden in hoeren ambocht, ende dat behagelick was voer den ogen gods, ghedaen ende gehanttiert hadde, ende seide: ,,Nu scheide ic van u. Vervult ghi die scholt der natu[r]en. Ic werde gheroepen van mynen here. Ende inden lesten daghe sal ic weder comen totti, ende dan sullen wi mit malcanderen ewelicken verbliden". Sie, aldus blidelicken sterven si, die hier die sunden cleyn ende groet geschuwet hebben mit al hoerre macht, ende hebben god ghedient in allen doechden.
Beschrijving
Een goed man wil weten hoe de ziel het lichaam verlaat. Hij krijgt het te zien van een rechtvaardig mens. De ziel verlaat het lichaam van deze persoon als een gouden vogel en het bedankt het voor de dienst tijdens het leven.
Bron
De Vooys, C.G.N., Middelnederlandse stichtelijke exempelen, Zwolle, 1953 pagina 103-104
Datum Invoer
2013-03-01 14:46:20