WEV016801 - Spot nait mit de duvel.

Spot nait mit de duvel.
Het is woar gebeurd in Farmsum.
Woonde n slechte kerel; hai was n oongeluk veur zien vrouw en wieder veur elk en ain. As hai in huus zat, har e voak n stok in de hand en doormit sluig hai aal moar op n hond, dei in zien verbeeln veur hom zat. Was gain hond, moar de duvel zol door den zitn en dei mos hai van de hoede holn.
In huus hong n kaugie mit n törreldoeve; de buurn harn ook zo’n doevie in huus. Op n dag lag zien doeve dood in t hok.
De kerel pakde hom dr uut en luip dr mit noar de buurn; stiekom zag e kans om in huus te komen en door verruilde hai de doeven. Hai kreeg de levendige en de dode kwam bie buurman in t hok.
Eevn loater komt de buurvrouw dr aan en begunt te scheln om dei gemaine streek. Moar de vent zee: “Ik heb nooit bie joe in huus west en as ie mainen, dat ik joen doeve in t hok heb, den maggen vandoage nog twei van mien dochtersdood goan.”
Buurvrouw droop of.
s Avonds om tien uur was ain van de dochters sturm.
De moeke zee: “Kiek, door hest ja al kerel. Doe mit dien grootsproak. Wat bist toch n ellendeling.”
Om twaalf uur lag de tweide dochter dood op bedde.
Toun wur de man deur n onzichtboar weezn van t berre oftrokn en zai vonden hom blauw achter n stoule zitn.
Dit mout de duvel doan hebben. Ain van zien zeuns muik hom weer op berre; dei jonge man zag niks gain biezunders in de koamer.
Het verhaal komt joe misschien wat roar veur, moar is gain woord van loogn. En nou t ende van de man.
Op n dag vonden ze hom dood in n dreuge sloot.
Zien kop zat dr verkeerd op; wis en zeker het duvel hom de nekke omdraaid. Zo komen spotters aan heur trekn.

SINSAG 0922 - Teufel bricht Sünder das Genick.    SINSAG 0922 - Teufel bricht Sünder das Genick.   

Maatregelen van duivel tegen man die duivel uitdaagt.

Collectie Wever, verslag 168, verhaal 1 (Archief Meertens Instituut)

Farmsum    Farmsum   

Farmsum    Farmsum   

C080p    C080p   

2013-03-01 14:46:21