ENGELB_02_011

[OH:] Tijman ziene plaats, ôp 'n kèèrk'nbeult hef den west, woa nô ôngevea 't kepelke stèèt, hef 't hoes staon, mè dat hoes, dat hef wa 'n oarig groot boer'nhoes west, dat hef de Vos zien'n net anzet'n en ônne 't laatkèèrk hef Breewnks-Johan, wat der nô nog lop, dat hef doa 'n vuiek'n bot bie Tijman vuur 'n nienduur en Tijman zien hoes is vrij köm'm, mè de schop is begun'n te bran'n, en doe is de schop verbraand en die stun vief mete van Vos zien hoes of en doe is de laatkèèrk oetgaon en al 't volk oet de laatkèèrk en doe hef de keplaon - ik döw die nich mea 'n naam van die keplaon te zeng - den is der tuske duurgaon, mè doe hebt ze bie de Vos nog an 't oetpak'n west en Tijman zien hoes ok an 't oetpak'n, mè de weind hef der nao staon at de Vos zien hoes zôl tref'n, mè zie hebt bie de Vos an 't oetpak'n west en doe har de keplaon zegd: zet der mè wier in, doa is niks bie; mè dat dôm'm ze nich te waong. De keplaon is wierum gaon nao de kèèrk hen en wat dee nô haald hef, in elk geval he hef 'n stool um daon en doe hef he 'n stool umdaon en doa is het met duur de vlam hengaon tuske Vos zien hoes en Tijman ziene schuur hen en de weind hef zich drèèid en der is niks ofbraand en dat is nog bie mien vare ziene tied west, at vare dat nog good wus. Dat sint wa mea leu hier, dee dat wa wet, wa heel völ.
Ik: "Boo lang is dat nô len'n dan?"
[OH:] Ja, boo lang kan dat len'n wen'n, Hennie, ik zin zömzestig, zömzestig, lao'w zeng ouns vare hef doe, dee was a wa trouwd, want he hef nen zet örgeltrapper west, lao'w zeng, at verlen'n is n tachentig joa. Ja, dikke tachentig joa.

TM 3116 - Persoon kan de wind draaien    TM 3116 - Persoon kan de wind draaien   

Kapelaan met stola om laat de wind draaien.

Collectie Engelbertink, verslag 2, verhaal 11 (Archief Meertens Instituut)

Tijman    Tijman