ENGELB_04_006

Wie hann naor de Pruus henwest in de joarn 1926 lao'w mer zengn, is dat west, doe ha'w nen motor koft van Peter Brouwers en den ha'w wa 'n joar had, koft, ja, nô, den man har ne ouns doar zao henzet en doar he'w doe metdöschet, motor ôp 'n waankje doe heb ik en 't Gröölke doar henwest, naor Nodhoarn, naor Peter Brouwers, doar he'w 'n motor koft en ofrekkend, lao'w mer zengn en doe was 't oarig laat 's aoms, doehe'w nog earst bie Lutters anwest in Daenekaamp, den har dat waerkvearig maakt, nô ja earst koffiedreinkn, mer doe zegt 't Gröölke tengn mie: "Woar fiets doe langs bie Singraamn of bie Schellings? Ik zeg: "Bie Schellings, want doar ôp 't Singraamn is 't mie völs te dööster". Mer de straot was d'r nog nich van Schellings hier ôpan, doar was nog niks van te vindn, alleen ne goein fietspad en doe zeg Graol: "Doar gao'k nich langs, want doar döcht nich". Ok net zao. He was nog nich trouwd in dee tied, he har nog verkearing met mien zuster. Ik zer: "Ik gao bie Schellings langs". He draeide bie Loman round um 't hoes hen, mer doar kwam he toch wa bie mie, wie fietsn te haop weg. Graol fietsn vuurôp en doe bie Paalth ôngevear, woar dat huuske doar steet van Broenink-Jan en doar ineens doar spreink Graol van de fiets en zeg: "Ja nô kö'w wierumgaon, want nô kö'w d'r toch nich langs". Ik zei: "wat is d'r dan?". "Ja, de weg zit dicht". En ik zag niks en doe bin'k bie hem langs gaon en ik zei: "D'r is ja niks". "Ja, nô kan ik d'r ok wa langs", zeg he, "Doar ginds löpt a".
E: He'j 't zölf nog zeen dan?
H: Ik heb niks zeen.
E: Mer Beand wa.
H: Jao zer he, ik heb 't zeen en doe he'w naor hoes henfietst, gung met mie in hoes en he kaek nog net zao wit at he mer kôn, he maenn ok werkelijk, at he doar wat zeen har.

SINSAG 0478 - Andere Erlebnisse; unbeschreibbare Spukerscheinungen.    SINSAG 0478 - Andere Erlebnisse; unbeschreibbare Spukerscheinungen.   

Man ziet iets op de weg, zijn metgezel ziet niets.

Collectie Engelbertink, verslag 4, verhaal 6 (Archief Meertens Instituut)