ENGELB_21_002

L: En owwer dee heks, hekserij, doar woar wie doar wounn in de Zoek, doar was ok ne buurvrouw, dee kon ok heksn, zedn ze dan, ik wet nich, wie warn ja jong keerls, doar wounn een bie in en den hetde Mölnbrook, dee wounn der bie in en dee vrouw was ok behekst, zoa at ze doe dan zedn hè, dat was nen militair luk, den hef doar op schötn op dee heks en doe hef den daagns dernoa met n kapot bean in t ber legn; joa zoa vertöln ze dan hè.
E: Mer dee heks, wat ko'j doar an zein, dat ze biezunder warn?
L: Nich völ, nee nich völ, ie kondn doar gewoon met kuiern en gewoon gungn ze wa met noar de keark hen.
E: t Hoovn ok nich pers´ne oolde vrouw te wezn.
L: Nee, t was zo'n vieftig joar hè, nog nich oold.
E: Nee, ze was ok nich oold.
L: Ik heb ze ja wa keand, Bruns-Trui was t hè, at ik doar kom, zeg mer, wie hebt doar nog nen hook ground, doar an de Glanerbruw, dan veur ik doar nog wa es langs, ik bin der zoaterdag nog wa langs veurd met n trekker dan. Mer dan deank ik der altied nog an en doar lag n wicht, ze hadn ok zölf ne dochter en nen zön en dee dochter dee hef lang in zo'n huuske legn an T.B. dat döadn ze ja vrower doar boetn hè, mer zie gung an t lestn wa doad, dan zedn ze ok, den har ze ok onder had. En doar was nog nen andern buurman, dee hetde Els-Jan, doar was n wicht dat was stapelgek op een moal, net at ze no dolt, zegt ze ok hè en doe was dat nich bie rechtoet, zedn ze de oolde leu dan, wie warn ja kinder, mer dat onthold ik dan altied nog wa en dat was nich bie rechtoet, dan gungn ze noar Glanerbruw hen, noar t Maristnkloaster an de Glanerbruw um road vroagen en doe hef mien vader der ok hen west met de vaa van dat wicht, wat doar ieder moal zonnen gekn zet har he zegd dee der no bie is den poater, met den poater hadn ze met kuierd en dan gavn ze ne fooi, dat he eer helpn zol en doe hebt ze, den no bie oe is, dee döt dat wicht an, joa, no, zie goat wier noar hoes hen, dat döa'w almoal lopend hè van de Glanerbruw noar de Zoek hen zedn ze ok, no hebt dan vrogd, wel dat west har, den en den, dee hebt mie n paar appel metbracht en doe hebt ze dee appel - vrower warn ze ja biegelöavig - hebt ze in de pan doan, hebt ze verbraand, joa.
E: Was der nen woarm oetkröpn of nich?
L: Den huurmans-mans hetn he, doe hadn ze zegd, den no bie oe is, den döt dat wicht an, dat is meer onder hypnose zegt ze, tegnwoordig ok zoawat.
E: Dat zee'j ok wa mangs vuur televisie.
L: En doe wusn ze wel at dat har doan. Doe hef n poater der ok wa west en doe hef dat wicht wier better west. He lewt nog, ik ken ze ja wa, was net n buurwicht van ouns.
E: Den is duur den geestelike, zeg mer, toch wa better maakt?
L: Joa,
E: Hef den geestelike een of aander gebed oetsprökn, of har den nen stool um?
L: Joa, zoa schuun zoa, den hebt ze dan um.
E: Har he ok n gebed oetsprökn?
L. Ok, dat lest ze oet zo'n beukske.
E: Joa zukke vaststoande gebeedn hebt ze der vuur.
L: Joa.
E: Dee zoagenaamde heks zeg mer, ko'j no nog mearkn dat ze der onder lear?
L: Dat wicht dat lear der onder.
E: Mer dee vrouw dan?
L. Dee gung t an, an t schreeuwn en tiern.
E: t Was gennen vallende zeekte dan?
L: Nee
E: Duwels oetdrievn.

SINSAG 0640 - Hexentier verwundet: Frau zeigt am folgenden Tag Malzeichen.    SINSAG 0640 - Hexentier verwundet: Frau zeigt am folgenden Tag Malzeichen.   

TM 3101 - Heks maakt kind (mens, dier) ziek    TM 3101 - Heks maakt kind (mens, dier) ziek   

Namen van heksen; beschieten van heks die de volgende dag gewond blijkt te zijn; met meisje dat appels krijgt van heks naar de paters, verbranden van de appels, bidden door paters verdrijft duivel.

Collectie Engelbertink, verslag 21, verhaal 2 (Archief Meertens Instituut)

G271.6 - Exorcism of witch by countercharm.    G271.6 - Exorcism of witch by countercharm.   

Molenbroek    Molenbroek   

Maristen    Maristen   

De Zoeke    De Zoeke   

Glanerbrug    Glanerbrug