HOOCH05 - HOE ULESPIEGHEL DEN PROCHIAEN AFSCHATTEDE SIJN PAERT DOOR SIJN BIECHTE.

HOE ULESPIEGHEL DEN PROCHIAEN AFSCHATTEDE SIJN PAERT DOOR SIJN BIECHTE.
Int dorp van Risenbrugge was een prochiaen die had een schoon
dienstmaecht, ende een schoon leen paert, welke twee die pape gelijc lief
hadde. So begeerde die hertoge van Bruynswijc seer dat paert vanden
pape te copen met ghelde ende hi sandt dicwil aenden prochiaen dat hi
hem dat peert wilde vercopen hi soude daer meer voor geven dant weert
is. Ende die prochiaen weerseidet altoos den hertoge want hijt so lief
hadde ende die hertoge en dorstet hem niet nemen want hi was onder die
raetsheeren van Bruynswijc geseten. Dit vernam Ulespiegel ende seyde
totten hertoge. Genadighe heere wat wildi mi geven dat ic u dat peert
gecrighe vanden pape. Die hertoge seyde ic sal u gheven minen tabbart,
ende die was root camelot met een mouwe van peerlen beset. Doe nam
Ulespiegel oorlof aenden hertoge ende vertrac totten pape ter herbergen
in dat voorseyde dorp ende hi was daer wel bekent so dat hi daer willecome
was want hi daer dicwils quam. Als Ulespiegel daer nu . iij. dagen
hadde geweest, so maecte hi hem siec ende bleef crane te bed liggen so
dat die paep ende zijn maget waren bedroeft. Ten lesten wert Ulespiegel
noch crancker dat hem die pape badt dat hi hem biechten wilde ende zijn
recht nemen vander heiliger kercken. Ende Ulespieghel was des blide
ende seer wel te vreden soe dat hem die selve prochiaen zijn biechte
hoorde ende ondervraechde hem neerstelic ende hi seyde ende vermaende
hem dat hi zijn siele bewaren soude dat hi berou mochte hebben, ende
dat hem god sijn sonden wilde vergeven want hi veel avontueren hadde
bedreven. Ulespieghel seyde hi en wiste maer een sonde die en dorst hi
niet biechten ende dat hi eenen anderen priester haelen soude die wilde
hise biechten want seyde hise hem hi sorchde hem te vertoornen. Doen
meende die prochiaen datter wat wonders verborgen was ende seyde
lieve vrient die wech is verre ick en can den anderen priester so niet
gecrigen, ende oft ghi daer binnen sterfde soe hadden wi beyde schult
voor god dat ghi versuymt waret. Biecht mi die sonde en sal so groot niet
sijn ic en sal u absolveren ende oft ic gram werde daer en is geen macht
aen want ick en mach geen biechte melden. Ulespieghel seyde ic wil dat
biechten maer ghi sout gram werden, ende die sonde en is so groot niet
maer dat gaet u aen. Doe verlangede den paep noch meer ende seyde, al
hadt ghi wat ghestolen of scade ghedaen oft wattet ware, dat hijt biechte,
hi soudet hem vergeven ende daer om nemmermeer haten. Ulespiegel
seyde, och lieve heere ic weet wel dat ghi gram sijn suit maer ick gevoele
mi so qualijc dat ict u segghen wil. Ick heb bi u dienstmaecht gheslapen.
Die paep vraechde, hoe dicwils. Ulespieghel seyde. Niet meer dan . v.
mael. Die pape peysde, vijf druesen sal hi daer voor hebben, ende hi
absolveerde hem haestelic ende ghinc van Ulespiegel ende hi riep die
maecht in sijn earner ende vraechden haer oftse bi Ulespieghel geslapen
hadde. Die maecht seyde, neen dat waer geloghen. Die paep seyde doe,
hi heeft hem daer af gebiecht, ende hi is so gestelt dat ict wel geloove.
Die maget seyde neen, ende die paep seyde ia, ende hi nam eenen stoc
ende sloechse al blau. Doe lach Ulespieghel in sijn bedde en loech ende
dachte, nu sal ic den paep wel hebben, maer hi bleef dien dach noch
liggen opt bedde. Inder nacht werdt hi al gesont, ende stont des morghens
op ende seyde dattet met hem gebetert ware, ende dat hi hem
seggen soude wat hi in sijn siecte verteert had. Die paep rekende maer hi
en wist niet wat hi dede so gram was hi, ende was te vreden ende die
maecht ooc dat Ulespiegel wech ghinc. Als Ulespieghel wech ghinc seyde
hi. Heere weest ghedachtich dat ghi biecht ghemelt hebt, ick sal ter
Halverstadt trecken biden bisscop ende sals mi beclagen. Die paep dit
hoorende vergat alle gramscap ende viel voor Ulespiegel op zijn knyen,
ende badt hem dat hi swigen wilde, hi soude hem geven . xx. gulden.
Ulespiegel seyde, ic en name niet hondert gulden dat let verswlgen soude,
ict salt aenden biscop brengen gelijc dat behoort. Die paep badt der
maget met weenenden oogen dat si tot Ulespieghel gaen wilde ende
draghen hem wat hij hebben wilde ende dat sijt hem gheven soude. Doe
seyde Ulespiegel, wilt hi mi dat peert geven ic en sal niet clappen ende
anders en wil ic niet hebben. Die paep had dat peert soe lief dat hi hem
liever noch so veel hadde willen gheven aen ghelde dan dat peert maer hi
moestet hem geven teghen sinen wille. Ende hi bracht dat peert den
hertoge van Bruynswijc daer hi grooten danc af hadde. Ende die hertoge
gaf hem sinen tabbaert die hem belooft was ende hi moeste den hertoge
vertellen hoe hi tpaert gecregenfcadde dies die hertoge blide was ende gaf
hem een ander peert, ende een tabbart, ende die pape bleef droevich om
sijn peert, ende dicwil sloech hi die maecht so dat si wech liep, ende so
werdt hise alle beyde quijt dat peert ende die maghet soe dat Ulespieghel
den paep verleede dat hi te voren so lief hadde.

VDK 1635* 05 - Eulenspiegel's Tricks. 5: Ulespegel maakt een pastoor zijn paard afhandig.    VDK 1635* 05 - Eulenspiegel's Tricks. 5: Ulespegel maakt een pastoor zijn paard afhandig.   

VDK 1635* - Eulenspiegel's Tricks    VDK 1635* - Eulenspiegel's Tricks   

ATU 1635* - Eulenspiegel’s Tricks    ATU 1635* - Eulenspiegel’s Tricks   

AT 1635* - Eulenspiegel's Tricks    AT 1635* - Eulenspiegel's Tricks   

Uilenspiegel beweert in een valse biecht dat hij naar bed is geweest met de meid van de priester. Hierop mishandelt de priester zijn meid en schendt daarmee het biechtgeheim. Uilenspiegel dreigt daarom naar de bisschop te stappen, maar de priester koopt dit af door hem zijn mooie paard te geven. Uilenspiegel schenkt het paard aan de hertog van Brunswijk en krijgt er een mooie jas voor terug.

Van Ulenspieghels Leuen. Uitgegeven door Michiel Hillen van Hoogstraten in Antwerpen, ergens tussen 1525 en 1546.

Tijl Uilenspiegel    Tijl Uilenspiegel   

Halberstadt    Halberstadt   

Brunswijk    Brunswijk   

Braunschweig    Braunschweig