RCALL0087_0089_13245 - Op een hoeve gebeuren de zonderlijkste dingen (Izegem)

Oe we joenk woaren weunden we ip Marialoop ip een boerhof. Moeder was ol doeod. Het spookte oltied bie oes, ol van voeor mien voader doa kwam weunen. Ze hèn nog ne keer heel de gebouwen ofgebroken en nieuwe gezet, mo ’t was geen advance. We han een kot woarin da we nooit geen beeste mochten zetten, of ze gienk doeod. In oes koestol was er een sliet, oe we er een beeste in zetten, ze hienk heur biekan ip van de skuwte. We mosten dat sliet (cel of logie met berd en latierboomen afgezet, waarin een koe, een paard enz. vastgebonden staat op stal: Westvl. Id. blz. 1034) oltied vrie loaten. Ne keer moste er een koe koolven. Voader gienk er bie woaken, mo je was nog niet heel in ’t koestol of je was oender de koe geslegen en zien voeten stoenden gedroaid. De moarte trok an een van zien voeten, mo je zei: “lat mie gerust, ’t doet zukken zeer”. Je hèt lange met een spakke geloeopen an de voet woaran ze getrokken had. Ip de zoolder was er oltied leven, precies of dat ze entwodde lieten volen. Ne keer riskeerde voader van te goan kieken, mo je zag nieten. Je hèt dat ton nooit ne meer gehoeord. Ip de voolte woa dat ne sliep kwoamen er ’s nachts oltied heren en doamen voor zien bedde; ze smeten het ol ip de groend wa dat er was. Zien floske oem ziene rugge te smoeten stond wok ip de skouwe, je peizde dat ze wok kapot gienk zien, mo oet ne ’s anderendoags keek was er nieten an. Mien broer die van Amerika ofgekommen was, sliep doa wok. ’s Nachts hoeorde voader die ip de zoolder sliep hem roepen. Je kwam en mien broer zei: “Voader gif ne keer miene kloef (klomp), ik goa er achter smieten. Er stoan doa heren en doamen an mien bedde.” Voader die ervan wistee, gaf hem wiewoater in de plekke en sliep ton doa in zien plekke.Oe voader verhuisde, gienk ne ip de zoolder, mo je was vaste gegrepen en ipheft. ’t Was liek of dat ze hem van de zoolden wilden smieten. Ze han nog vroeger ne keer achter de paters gewist oem te belezen mo ’t was geen advance. Ze han pertank gelezen dat ze zwitten. Er kwam ton nen anderen boer doa weunen. Je lachte doa ollemolle mee en zei tegen voader: “’t Is ol geen woa wa da je doa verteld hèt. Er zitten nu beesten in dat kot, en er is nog nieten an”. Mo je lachte te tielijk. Een bitje loater begoste het ol, zelfs zien vrouwe is ziek gekommen. Ze is doeodgegoan. Ne keer kwam ne ’s oavends buten, zien hoendje baste geweldig. ’t Was ne put die brandde. Je liep achter nen gebuur, mo den deen zag nieten. Je gienk wok de poaters hoalen oem te belezen, mo ze zeien dat ze er nieten kosten an doen oemdat ze het ol tegen te vele verteld han.

SINSAG 0478 - Andere Erlebnisse; unbeschreibbare Spukerscheinungen.    SINSAG 0478 - Andere Erlebnisse; unbeschreibbare Spukerscheinungen.   

In een boerderij in Oostrozebeke spookte het. Er was een hok waarin men geen enkel dier kon zetten, omdat alle dieren er stierven. Toen de boer ging waken bij een koe die moest kalveren, viel hij onder de koe zodat zijn voeten scheef stonden. Ook op de zolder was altijd lawaai. Wanneer men ging kijken, was er niets te zien, maar werd men wel bijna door een vreemde kracht van de zolder gegooid. In de slaapkamer verschenen 's nachts altijd dames en heren die alles overhoop gooiden. Men had al paters laten komen, die hadden gebeden tot ze bezweet waren, maar dat had niet geholpen. Uiteindelijk is de boer met zijn gezin verhuisd. De nieuwe bewoner van de boerderij beweerde dat er niets aan de hand was, omdat zijn dieren in de stal nog steeds in leven waren. De vrouw van de nieuwe bewoner is echter ziek geworden en kort daarop gestorven. Op een avond stond de waterput naast de boerderij in brand. Op een windstille dag gebeurde het ook eens dat de man als door een stormwind naar het water werd gedreven, waardoor hij zich uit alle macht moest verzetten om niet in het water te belanden.

R. Callens, Leuven, 1968

1.4 Luchtgeesten

west-vlaams (tielt en izegem)

188

memoraat

Oostrozebeke    Oostrozebeke   

Oostrozebeke    Oostrozebeke