STOP0286_0287_21431

M’an wieder zeven melkkoeien en ’t wos mor een gekolfd en d’andre stoend droge. En up e zekern keer dat me kernden en me kregen geen beuter. ’t Wos ol schuum en ’t stoenk e masse. En ezo deurde dat verschillende weken voort. En me kregen bezoek van menschen van Werken die hier nor de vandiesche kamen. En ze klappen van olles en mijn moeder vertelde ook van die melk die geen beuter gaf. En die menschen zein: "M’èn wieder dat ook hèt. Je moet gon nor de paster. Je gaat hij kommen en dat gaat toen gedon zijn." En moeder ging nor de paster en o ze dor binnenkaam, de paster zei: "Zet je mor. En hoe gaat het ol?" "’t Is dorvoren dat’k kommen", zei ze en ze vertelde dat ol. "Ja", zegten, "en ej up niemand geen persoensche?" (vermoeden); "’t Is e vromens", zegt moeder, "die nog nooit gekommen et achter melk mor z’e nu achter e pinte melk gekommen. Mor z’e nooit meer were gekommen." Up èn uchtend die deure stoend e keer open en ’t wos in dien nacht dat ze dor geweest wos en mijn broere Medard zei tegen de poester: "J’e gij de deure niet goed toegedon want ze stoend open." Enne dei ze dien avond zelve toe; Mor ’s anderndaags ze stoend were open. Z’had zij dor twee keren geweest. "Ja", zegt de paster, "’k gon e keer kommen up e dag daj geen volk et." En up Asschewoensdag, ze werkten toen niet, dat wos lik e mestdag. En ze zond de poester die dag up komische. En de paster kaam enne vroeg e panne haver, e polmtakschge en gewijd water. En je ging mee met moeder ol achter in ’t koeistol en je las over die eerste koe die gaf. En j’had eerst d’haver gewijd en je gaf die koe e grepe haver uut die panne. En je dei toen e gebed over ol die andre koeien die dor stoen en je gaf z’elk e grepe haver en je smeet gewijd water met ’t polmetakschge. "Ja," zegten, "’t zal wel beter zijn en o ’t niet beter is, je meugt werekeren."

SINSAG 0580 - Andere Hexenkünste    SINSAG 0580 - Andere Hexenkünste   

Op een boerderij waar men zeven melkkoeien had, kon men geen boter meer karnen. Van een vrouw uit Werken kreeg de boerin de raad om de pastoor te laten komen. De geestelijke vroeg aan de boerin of ze niemand verdacht. Daarop zei de boerin: "Er is een vrouw die hier nog nooit eerder melk is komen halen, maar die een tijdje geleden toch een glas melk kwam vragen. Daarna is ze nooit meer teruggekomen". De volgende ochtend stond de deur van de koeienstal open en een dag later gebeurde hetzelfde opnieuw. De pastoor besloot terug te komen op Aswoensdag omdat de boeren dan niet werkten. Die dag vroeg de pastoor een pan haver, een palmtakje en wijwater. Daarna ging de pastoor met de boerin naar de koeienstal, overlas de dieren en gaf hen gewijde haver. Vervolgens gooide hij het palmtakje met gewijd water in de stal.

S. Top, Leuven, 1964

2.1 Heksen

west-vlaams (vrijbos)

164C

memoraat

Aswoensdag    Aswoensdag   

Zarren    Zarren