VRIES003301

't Kasteeltje, dà ken je wè, meneer, das tussen Rapenburgtol en Luntershoek (Gem. Vogelwaarde).
A je vô 1900 't ongeluk aa een krepele voet tèn, een misvurming, een bulte bievôbeeld, dan mos je maa schoenmakersknecht of kleermakersknecht oren (worden), want dan was j 'ongeschikt vô 't zware landwerk.
Zo aa je Cies Verbraeken uut Rapenburg (Stoppeldijk), die aad een bulte op zen rugge. 't Was een grappemaker in mee vee durf.
Ie lustten gèrn een pinte in die was nie getrouwd.
's Zaterdasaves van de barbier gieng tie in 't café een potje kaarten. Ze geraakten an 't praten in 't gieng over durven.
Weet jie wè zei ter een tegen Cies, dat 't in 't Kasteeltje à te klokke twaalve slaat, spookt?
Geen mens dost daa te slapen, vô geen (h)onderdduuzend gulden!
Hô, zei Cies da zou 'k anders wè durven. Afijn, 't kwam zoverre dà Cies der na toe zou gaan. Ze mosten eest na de koster, want 't was toen nie beweund in de koster aa de sleutel.
Zudder mee een man of viere na 't Kasteeltje in Cies zat al om elf uren boven in 't torenkamertje.
In noe ma wachten totdat de klokke twaalf uren slaat docht Cies.
Maar à d eeste slag valt vliegter een blinde deure open in daa kommen zeker wè 20 witte gedaanten, zeker geesten, binnen en die beginnen in de ronde te dansen mee een soort van slienger.
Ze vliegen mee een vreselike vaart deu de ronde in bie den achsten slag griept den achtersten geest Cies bie z 'n èrm in sleurt em mee in de ronde. Bie de twaalfde slag bin z 'opees verdwenen, ma Cies ei zovee gank, dat ie mee een slag mee z 'n rugge tegen de muur angekwakt oort (wordt), dat ie der nie meer af kan!
Den anderen mèrgen staan d 'er een êlen (h)oop mensen vô 't Kasteeltje want 't (h)alve durp weet à dà Cies daa geslapen eit.
Da gaan der ienkele na boven in ze roepen: "Cies, leef je nog?"
Z '(h)oren Cies roepen in kermen: "'k kan nie van de muur losgeraken" roept ie. "Bi je zot man", zeggen z 'as ze boven kommen in ze beginnen mee een man of vuuf, zesse te trekken. In opees schiet ie los in warempel nou is tie z 'n bulte kwiet, die is in de muur zeker bluven zitten, ma da kunnen ze niks van ziene. Ma vèder mankeer Cies niks, da was geen wonde of iets an z 'n rugge!
Sjef Bilteriest (Bilterijst), da waster een van (H)engstdiek, die aad ook een bulte in die (h)oorden van dà geval.
Die docht: dà gaank ook is proberen. Dus Sjef laat z 'n eigen opsluuten op een nacht kort daarop.
In da speel z’n eigen wêe ’t zelfde af as bie Cies.
Ma bie Sjef gieng 't op ’t leste een bitje anders.
Want toen de geesten em dan loslieten vloog tien ie mee z 'n rugge, maar mee z 'n bost op dezelde plekke van Cies tegen de muur in da bleef tie vast zitten.
Den anderen mèrgen kom zowà 't eele durp na 't Kasteeltje kieken in die à na boven gaan zien Sjef daa, net as Cies, tegen de muur geplakt zitten maa dan wel andersom.
Ze trekken in ze trekken; ze kriegen em los ma noe zit ie mee de bulte van Cies op z 'n bost en eit tie z 'n eele leven mee twee bulten moeten lopen!

Over spokerij op kasteel, waarbij bult van uitdager aan muur blijft vastplakken, en die bult bij volgende uitdager aan de borst blijft plakken.

Collectie De Vries, verslag 33, verhaal 1 (Archief Meertens Instituut)

in 1970 samenvoegen van Rapenburg met buurdorp Boschkapelle tot Vogelwaarde

Rapenburgtol    Rapenburgtol   

Cies Verbraeken    Cies Verbraeken   

Stoppeldijk    Stoppeldijk   

Rapenburg    Rapenburg   

Vogelwaarde    Vogelwaarde   

Luntershoek    Luntershoek   

Vogelwaarde    Vogelwaarde