SPINR095 - Die evangelien vanden spinrocke

¶ Het vervolch vander dachvaert des vridaechs, ghedaen bi vrou
Gomberde.
930 Als die vridach quam, al eer vrou Gombaerde comen was, so vertelden
si haer goede chiere, die si tsavonts gemaect hadden na dat ic
wech was. Vrou Mabelie sprac tot Floretten vanden Velde: "Segt
ghebuer, hoe voerdi ghisternavont doen ghi de derde pinte so
wel getoest had?" Si antwoerde: "Ser wel, mer die slaper, mijn man,
935 sliept al doere sonder hem iet te verruren, al soudi ramp
hebben. Ende ghi, vrou Mehaute? Hoe mocht ghi doen, want het
sceen al u te wesen; en wecte ghi Ployaert, uwen man, niet doe ghi
slapen quaemt?" "Aylacen," antwoerde vrou Mehaute: "Men machen
voertaen wel met gemake laten, wanttien doech niet meer, ja min dan
940 niet. Dat hi qualic varen moet, want hi is so cout ende so
traech, al waer hy van stene ghemaect!" Doe seide dair noch een
jonc meissen: "Vrou Mehaute: ghi die so out sijt, soudi noch
willen alsulc dinc gedaen hebben, hebdi noch aderen die derwers
trecken?" Doe seide vrou Mehaute, als seer gestoert stellende haer
945 handen in hair side: "Voerwaer, ic heb noch een ader daertoe, ende
om dat te begeren en derfmen niet sien na douderdom, mer naden
goeden wil. Weet oec voerwaer, dat mi noch die boter inden mont
smelt, al ist saec dat ic niet wel en can noten gecraken, om
datic maer eenen tandt en heb." Doe quam vrou Gombeert die Fraye
950 om te bestaen haer evangelie, van welker comst si hem begonsten
te stillen, al vielt hem suer, want vrou Mehaute was so ontset
ende verbolgen, om deswil datsi, die mer .lxxvij. jaer out was,
geheeten was out te syne. Ten laetsten doch so sweech si, als
sijer lange genoech om gebeden was. Ende so nam ic mijn penne
955 bereet om voert te scriven, tghene dat my vrou Gombeerte seggen
soude. Mer al eer ick voerder vare, wil ic u eerst segghen wie
dese doctoresse, vrou Gombeerde was. Si was van harer moeder
weghen van Avensuen, ende van haers vaders wegen uut Peemont, ende
was genoech van sconen ende simpelen manieren vore die lieden,
960 want si scaut haer selven edel te wesen. Mer die wat verloren
had, dien wijsde sijt, ende die yewerts een heymelic meissen te
doen hadde, dien gheriefde si om heusschen loon, ende met
dier practiken onderhielt si haer meest. Si was subtijl, soe
hierna bi haren lessen wel schinen sal. Als si was gheseten,
965 begonste si aldus:
¶ Het eerste capittel.
"Nu hoert, ende laet wesen u gherufte, ende laet ons beginnen
ter eeren vanden vridach daer wy inne sijn, te sprekene vanden
heilighen sacramente des huwelics, wantic heb .vij. mans ghehadt,
970 ende nyet te min: quame die achte na minen passe, ic souder
na luysteren. Ende op dat hi mi seer lief mocht crigen, soe
soude ic hem teten geven wermoes, des noens op Sint Jans avont
ghepluct, ende voerwaer, hi en soude mi niet konnen gelaten om
eenighe ander, hoe jonc die oec waren." (Glose) Daer op seide
975 Beelken Corthiele: "Stake een wijf in haers mans ore capoene plumen
die kieken geleit had, ende thaer vanden rechteren voet, ende
thaer van sinen hoefde, ende thaer vander kattensteerte, hi en
mocht nemmermeer haer liefde vergeten."

Vrijdag, eerste kapittel. Vanaf hier is vrouw Gombaerde, een sluwe zevenenzeventigjarige, aan het woord. Voor zij begint met haar evangeliën, hebben de vrouwen het erover dat ook oude vrouwen nog zin hebben.
Als een vrouw tijdens de noen op Sint-Jan groente plukt en dit aan haar man geeft, dan zal hij haar nooit verlaten voor een ander.
Als een vrouw in het oor van haar man kippenpluimen, haar van de rechtervoet, haar van zijn hoofd en haar van een kattenstaart doet, dan zal hij haar liefde nooit vergeten.

G.J.Boekenoogen (ed.): Die evangelien vanden spinrocke. 's-Gravenhage 1910 (facsimile)

ca. 1520

vrou Gomberde    vrou Gomberde   

vrou Gombaerde    vrou Gombaerde   

vrou Mabelie    vrou Mabelie   

Floretten vanden Velde    Floretten vanden Velde   

vrou Mehaute    vrou Mehaute   

Ployaert    Ployaert   

Gombeert die Fraye    Gombeert die Fraye   

vrou Gombeerde    vrou Gombeerde   

Avensuen    Avensuen   

Peemont    Peemont   

Sint Jan [Sint-Jan]    Sint Jan [Sint-Jan]   

Beelken Corthiele    Beelken Corthiele   

2013-03-01 14:46:20