DEVOOYS008

Och woe voel onvreden coempt duck ynden geestliken conventen van eenre onrustiger susteren, die altoes murmurie[r]t ende mishaghen hefft, wat sy siedt off hort! Myt deer eenre kyffse, myt der anderen spotse. Die eene is oer [toe] cloeck, die ander toe plump. Die eene eit off drinckt oer toe voel, de ander duet oer to weynich. Die eene is oer toe licht, de ander to swaer. Nu lustert sie hyr, nu ruynt sie daer. Nu en behaget oer dyt nyet, nu dat nyet. Alle dynck wyl sie wetten/ende meysteren, ende gheen dynck en kan [sie] swijghen, of sie moet bersten. Dese onruestige suster mach wal gheliken der vlegen, dat een onstede ende eyn onreyn deer is, die nu hyr vleyget, nu all daer, nu den eenen steckt nu den anderen, ende op welke staedt sie coemt die ontreynt sie. Oick mach sie wal gheliken eenre ydelre tonnen die daer lichtelick wentelt ende rommelt. Soe doet ock dese suster, want sie een ydel vat is van bynnen sunder ynnicheit, soe wentelt sie hyr ende daer ende rommelt altoes. Oeck als een ongesmert wagen altoes pijpt ende carret war he henen vaert, soe is oick myt deser susteren; want sie niet gesalfft en is myt der salven des heligen geestes, daer om pijpt se altoes ende carret waer sie gheet, ende brenget oick somige ander susteren daer toe, geliker wijs eyn verken dat garret duet die anderen oick garren. Hyr om ist groet noet dat alsoe daen susteren seer gestrafft werden, sonderlinx van oeren oversten.

Er is veel onvrede over een onrustige zuster, die zich steeds ergert aan alles wat ze ziet of hoort. Zij is een ijdele vrouw en daarom onrein, want wie ijdel is van buiten is onrein van binnen. Hierbij betrekt ze ook andere mensen, dus ze moet gestraft worden door de overste.

De Vooys, C.G.N., Middelnederlandse stichtelijke exempelen, Zwolle, 1953. Tweede afdeling. Exempelen uit de spegel der susteren. Pagina 10-11

15de eeuw

Heilige Geest    Heilige Geest   

2013-03-01 14:46:20