DEVOOYS045

Exempel. Men leest een exempel dat was een heiden, die was een lants heere, ende dese man quam aen den barnede corts, ende die hitte van den cortse die sloch hem int hoot, soe dat hi rasende waert ende recht oft hi wt den sinne gheweest hadde. Mar die ghene die bi hem waren, die bewaerden hem, soe dat hi niet en mesdede. Op eenen nacht alsi alle sliepen, soe stont hi op al naect, ende liep in een wilde bosch, ende was daer drie daghen lanc. Ende die lieden en wisten niet waer si hem verloren hadden. Als dese drie daghen leden waren, soe quam hi tot hem selven, ende hadde sine sinne alsoe wel als hi te voren hadde, eer hi de corts hadde. Ende als hi sach dat hi daer was, soe peysde hi hoe hi daer ghecomen was. Ende hi en sach nerghens stede daer hi toe gaen mochte, mar van verren soe sach hi enen berch, ende daer was groote claerheide op. Hi ghinc tot aenden berch ende pijnde op te climmenne met handen ende met voeten, soe dat hi daer quam. Daer sach hi enen coninc sitten op enen guldenen troen, ende dat was onse heere selve, ende bi hem die ghebenedide maghet marie ende vele andere heileghen, beide oude ende ionghe. Ende doen was daer een tot hem ghesent met eenen cleede, ende dat hi dat soude aendoen ende comen voer den coninc. Ende doen hi daer quam ende sach den coninc sitten in eenen guldenen troen ende alle die bi hem waren in guldenne sittenne, doen seide onse heere tot hem: "Hebstu enich scoenre dinc ghesien inder werelt?" Endi hi seide: "Nenic, heere". Doen seide onse heere: "Ic ben der kerstenne god ende heere alre moghenthede, ende du selt weder keeren tot dinen volcke ende du sels soeken dese twee priesters, ende die selen di leeren dine salichede". Doen seide hi: "Heere, van hier en mach ic niet gaen". Doen seide onse heere: "Du moets van hier gaen ende du moets ghesuvert worden van dinen sonden". Ende doen was daer een man met eenen witten peerde bereet, ende voerde hem in sine stede. Ende hi seide wat hi ghesien hadde, ende ontboet die twee priesters tot hem. Ende hi ontfinc dat kersten ghelove ende vele van sinen volcke met hem. Ende hi toende dat cleet dat hem aen ghedaen was, dat sere selsen was, want het en was gheweven noch ghenayt. Ende dese man was soe verandert in hem selven oft hi een ander mensche hadde gheweest, ende hi levede wel, ende starf salichlike. Ende doen quam hi in dat euweghe rijcke.

Een heidense landsheer kreeg hoge koorts waarbij hij, als gevolg van de hitte, waanbeelden kreeg. Op een nacht liep hij naakt door het bos, waar hij vervolgens drie dagen verbleef. In de verte zag hij een berg oplichten en hij liep daar naartoe. Hij klom op de berg en eenmaal boven gekomen zat de Heer op een gouden troon met naast hem de maagd Maria en andere heiligen. Hij kreeg een kleed aangeboden die hij moest aandoen. De Heer had een boodschap voor hem. Toen de man deze boodschap had vervuld en helemaal tot bezinning was gekomen stierf hij een zalige dood en kwam in het eeuwige rijk terecht.

De Vooys, C.G.N., Middelnederlandse stichtelijke exempelen, Zwolle 1953, pagina 31

God    God   

Maria    Maria   

2013-03-01 14:46:20