DEVOOYS091 - I. VAN SINTE FRANCISCUS. EEN ANDER EXEMPEL ENDE MIRAKEL VAN SINTE FRANCISCO.

I. VAN SINTE FRANCISCUS.

EEN ANDER EXEMPEL ENDE MIRAKEL VAN SINTE FRANCISCO.

Het is ghesciet inder steden ymolam, want die buscop vander voerseider stat hadde groten hate ende nijde op die minrebroederen, ende vervolchdese ende dede hem veel scanden ende lachters. Ende als hi met gheender goedertierenheit beweecht en mochte werden tot ontfermicheit ende mynne totten broederen waert, mer als een steen bleef verhaerdt in sijnre nijdicheit, soe gheviel op eenre nacht dat die coster vander meester kercken in sinen ghebede was inder kercken. Ende hi hoerde dat sinte franciscus beelde ende sinte pauwels beelde, die welcke dat daer te gader ghepingeert stonden in eenre glasen veynsteren vander kercken, malcanderen onderlinghe toe spraken. Ende sunte pauwels die seide tot sinte franciscus aldus: „Segt mij, broeder franciscus, waer om en bescermstu dijn oerden niet ? "Want dese buscop dijn broeder seer moeylijc is ende dijn oerden wil verdrucken". Sinte franciscus antwoerde hem: „Pauwels broeder,ic draghe dat cruse cristi in mijn handen, ende daer om behoert mij toe dat ick lijdsaem sij[n]". Sinte pauwels seide weder: „Neen francisce broeder, alsoe en maht niet wesen! Mer ghif mij hier dijn cruce ende nemet du mijn swert, ende ganc ende bescherme dijn oerdene". Doen sach die coster dat si onderlinge wisselden, ende wert seer daer af verwondert in hem selven wat hier af ghescien soude, want staende voer dat glasen veynster sach hi openbaerlijc met sijnen oghen dat sinte franciscus in sijn handen hadde sinte pauwels sweert, ende dat sinte pauwels in sijn handen hadde sinte franciscus cruce. Nu hoert hier een wonderlijc ende verveerlic dinck, wat hier af ghesciede. Des morghens, doen die canonicken becommert waren in die heilighen dienst der metten, soe quam haestelijc een knecht van des buscops paleyse in die kercke ende seide den canonicken ende al den volcke, hoe dat die busscop ghedoot waer ende dat hem sijn hooft of gheslaghen was, daer hi lach op sijn bedde. Ende als si dit hoerden, worden si alle met groten anxte ende verveernissen begaen, wantmen niet en wiste wie dattet ghedaen hadde. Mer doe die coster vernam wat daer ghesciet was, vertelde hi den canonicken wat hi inder nacht ghehoert ende ghesien hadde, ende toenden hen inder glasen veynster die dinghen die hi hen vertelde die hem in de voorledender nacht gheopenbaert waren. Ende dat meer was, sij vonden dat swert noch nat ende bloedich wesende. Ende als sij dit saghen, soe bekenden sij hier wt dat die knecht gods sinte franciscus inder waerheit over sijnen viant ghewroken hadde, ende sijn oerden hadde bescermt, waer af dat grote vrese was op alle die ghene die dese dinghen hoerden ende hadden sinte franciscus in groter werdicheit. Ende niemant en dorste hem voert meer teghen die broederen setten, mer si predicten daer ende deden daer grote vruchten der zalicheit inden volcke.

Een bisschop haatte zijn minderbroeders en maakte ze aldoor belachelijk. Op een nacht hoorde de koster de beeltenissen van Sint Franciscus en Pauwels met elkaar praten. Pauwels vroeg waarom Franciscus zijn orde niet beschermde. Franciscus zei dat hij het kruis van Christus draagt en daarom moet hij lijdzaam zijn. Sinte Pauwels gaf hem zijn zwaard en hij nam het kruis van Franciscus over en zei dat hij zijn orde moest gaan beschermen. De volgende ochtend was de bisschop vermoord. Zijn hoofd was er met een zwaard afgeslagen, dit had Franciscus gedaan. Vanaf dat moment durfde niemand zich meer tegen de broeders te verzetten of er kwaad over te spreken.

De Vooys, C.G.N., Middelnederlandse stichtelijke exempelen, Zwolle 1953, pagina 69-70

Franciscus    Franciscus   

Pauwels    Pauwels   

Paulus    Paulus   

Christus    Christus   

2013-03-01 14:46:20