DEVOOYS106 - Van enen scolierkene die een lesse singhen soude te mettene

Men leest dat was een scolierken, die een lesse soude singhen op enen kersnacht. Ende die scoolmeester hadde den scolierken gheseit, dat een kindeken soude worden gheboren van eenre maghet, daer men den dienst af houden soude. Dit scoolkint was onnoesel, ende peysde, hoe hij dat kindeken soude moghen sien, daer men soe veel blijscapen ende feesten af hielt. Het gheviel dat dit kint des nachts een lesse singhen soude in die kerke, ende het hoorde een kindeken weenen. Ende hi sach, dat kindeken lach opten outaer. Ende soe wanneer dat dit scolierken sanc, soe screyde dat kindeken, dat daer lach opten outaer in doexken ghewonden. Ten lesten soe sach tscolierken soe vele op dat kindeken, dat sijn lesse qualic sanc. Die meester waert gram, om dat tscolierken soe qualijc sanc, ende hieten voer hem sien, oft hi souden slaen. Tscolierken sanc vast voert, ende dat kindeken screyde, Soe dat scolierken weder qualijc sanc. Doe soe nam die meester sijn hant, ende gaf den scolierken enen slach. Ende doen soe seyde tscolierken: ,,Lieve meester, ic en can mijn lesse niet bat ghesinghen om des kindekens wille, daer ghi ons af hebt gheseyt, want het leedt en screyt opten outaer, ghewonden in doexken. Ende als ic singhe, soe screyt". Die meester seyde: ,,Waer leet dat kindeken ? Gaet ende wijset mij !" Dat scolierken seyde: ,,Opten outaer leghet, in doexkens ghewonden". Doe seyde die meester toten scolierkene: ,,Bidt den kinde, dat hij mijns ontferme, want ghij sijt beter dan ic". Amen.

De scholier moet tijdens de kerkdienst van kerstnacht een les zingen. In tegenstelling tot zijn meester kan het kind een baby horen huilen en deze ook in doeken gewikkeld op het altaar zien liggen. Het zingen lukt niet, omdat steeds wanneer het kind zingt, de baby gaat huilen. Als de meester zijn leerling vals hoort zingen, wordt hij eerst kwaad. Maar als hij erachter komt dat zijn leerling een visioen heeft dat hij niet kan zien, vraagt hij de jongen om voor hem te bidden, want het kind is duidelijk een beter persoon dan hij zelf.

De Vooys, C.G.N., Middelnederlandse stichtelijke exempelen, Zwolle, 1953 pagina 90-91

Zie ook DEVOOYS107

Jezus    Jezus   

2013-03-01 14:46:20