NOOIJER000104

Nieuwerkerk (Duiveland)
Vaoder was knecht bie Job van der Have in ’t oekje van den Nieuwerkerksen diek. Op ’n keer zei d’n baes: “Jaap, gae ja vanaevend es ’n keer mee visse? In ’t Stêênzwaen zit vee paelik.” Vaoder zei netuurlijk: “Da doe’k baes.” Ze gienge ’s aevens om zeven ure weg. Toet twelf ure vienge ze meraokel vee paelink. Mae toen ieuw ’t op. D’n baes zei: “Jaap, jie bin toch gin benauwde schieter, ee?” Vaoder zei: “Da bin ‘k nog nooit eweest; waerom vraeg je dat?” “Ja,” zei d’n baes, “di za wat te kiek komme en daerom ek joe ok mee enome. Oôr mè, di komme ze.” Een geruus deur ’t riet. Ze konne nie zien, wat ’t was, ze zagge allêên mae twi ôôgen, zo grôôt as ballen. Vaoder verschrok toch wè ’n bitje en ie vroeg: “Wat is dat noe?” “Stille mè,” zei d’n baes.
Recht voe d’r was ’t net uut espanne. En allemae ôôrden ze dat geruus in ’t riet en die oôgen bleve mae kieke. Nae ’n kwartier of zo gieng ’t weg. Ze wouen ’t net opaele, mae dat zat stik vast. Dat zoue ze dan mergenochend wè doe.
Ze gienge nir uus. Op d’n diek ôôrden ze ’n soort geritsel of gekraek. Net zo ies as van nieuwe kraekende schoenen. Dat geluud bleef altied zowat vuuftig meter achter ulder.
Bie ’t zwarte sluusje stieng een weegbrugge. D’n baes zei: “Jaap, nie over de brugge lôôpe, oor.” “Waerom nie?” vroeg vaoder. “’k Lop er altied over.” “Ja, dat kan wè,” zei d’n baes, “mae toch nie ’s nachs tussen twelve en êên. Ze kunnen je ni benee trekke.” Toen ze bie de brugge kwamme, zag vaoder d’r onder een grôôte klompe vier, net of a ’t brand was. Vaoder zei: “Baes, de boel stae in brand,” mae den baes zei: “Neeë, gin nôôd. Mae nie op de brugge lôôpe.” Vaoder zei: “Oe is dat noe ier? ‘k Begriepe d’r niks van.” “Spoken, “ zei d’n baes, “uut de oudheid. Da’s iederen aevend zo van 12 tot 1 ure.”
D’n anderen aevend was ’t net êênder.
A vaoder ’t vertelde, dochen me allemaele, dat ’n wezenlijk gelôôfde ok.

SINSAG 0478 - Andere Erlebnisse; unbeschreibbare Spukerscheinungen.    SINSAG 0478 - Andere Erlebnisse; unbeschreibbare Spukerscheinungen.   

Vader vertelt hoe hij met zijn baas bij het vissen tot middernacht veel vis vangt, dat daarna vreemde dingen gebeuren, zijn baas waarschuwt om niet over een weegbrug te gaan omdat men tussen 12 en 1 uur 's nachts naar beneden getrokken kan worden, dat hij onder de weegbrug een vuurbal ziet, die spoken uit de oudheid zijn die iedere avond van 12 tot 1 uur opduiken.

Collectie De Nooijer, verslag 1, verhaal 4 (Archief Meertens Instituut)

Job van der Have    Job van der Have   

Stêênzwaen    Stêênzwaen   

Nieuwerkerkse    Nieuwerkerkse   

Jaap    Jaap   

Steenzwaan    Steenzwaan   

Nieuwerkerk    Nieuwerkerk   

Duiveland    Duiveland   

Nieuwerkerk    Nieuwerkerk   

2013-03-01 14:46:21