MVS001 - Hier beghint der maget Liedwy van Scyedam haer leven. Van haer wonderlike gheboerte. Dat eerste capitel

Hier beghint der maget Liedwy van Scyedam haer leven. Van haer wonderlike gheboerte. Dat eerste capitel
DOe hertoech Aelbrecht uut Beyeren grave van Hollant ende van Zeelant was, doe was in die stede van Sciedam een goet kersten man gheheeten Peeter Jans sone, gheboren van ridders gheslechte, maer also verarmt, dat hi bi hertoech Willems tyde - die hertoechs Aelbrechts soen was ende na hem grave van Hollant - sijn nootdorst moeste winnen met des nachts te wakene binnen der stede van Sciedam.
Dese Peeters vader was gheheeten Jan Peeters sone. Ende dese was also eerbaer ende also reckelijc van leven, dat hi na sijns wijfs doot bat dan vijftich jaer levede; omtrent tot sinen neghentichsten toe daer hi in sterf, nye wijf en bekende. Ende twee daghe in de weke vastede hij te water ende te broode ende niet dan sondaechs vleesch en at.
Dese Peeter Jans sone oudevaer* leydde sijn leven na den loop der werelt slechtelijc ende in vele arbeydens om sijn nootdorst te winnen, ende nam uut den* dorpe van Ketel (dat by Sciedam gheleghen es) een wijf gheheeten Peeternelle. Daer hy eerst by wan vier sonen ende daer [217Rb] na een dochter, ende na die dochter weder vier sonen. In welke baringhe deser kinderen leet die moeder also grooten last, dat sij in* tween of in drien daghen qualike conste verlost gheworden, uutghenomen die dochter, die sij sonder groote pine ghebaerde. Want doe sij opten heileghen Palmsondach was in die kerke ghegaen om den dienst Gods te hooren, ghevoelde si onversienlike haren tijt nakende. Ende doe men die Passie Ons Heeren sanc inder hoomessen Sijns Heileghen Lijdens, soe ghinc sij haestelijc thuusweert ende baerde dese dochter sonder grooten last ende pine als int jaer Ons Heeren MCCC ende LXXX in die vijftienste kalende van april, ende hiet haren name Liedewy, tot enen teeken dat sij noch wijt soude worden in liden. Dat es, dat sij veel om Gods wille soude lijden.

Familie en omstandigheden waaronder Lidwina van Schiedam werd geboren.

Het leven van Liedewij, de maagd van Schiedam. Ed. Ludo Jongen en Cees Schotel. 2e dr. Hilversum: Verloren, 1994

Per hoofdstuk ingevoerd.
Tekst en informatie http://www.dbnl.org/tekst/_lie002lied01_01/

Scyedam    Scyedam   

Aelbrecht van Beyeren    Aelbrecht van Beyeren   

Sciedam    Sciedam   

Hollant    Hollant   

Zeelant    Zeelant   

Jan Peeters    Jan Peeters   

Peeter Jans    Peeter Jans   

Peeternelle    Peeternelle   

Palmsondach    Palmsondach   

Liedewy    Liedewy   

Liedwy van Scyedam    Liedwy van Scyedam   

God    God   

Willem    Willem   

Palmsondach    Palmsondach   

Ketel    Ketel   

Scyedam    Scyedam   

Sciedam    Sciedam   

Schiedam    Schiedam   

K003p    K003p   

2013-03-01 14:46:21