MVS024 - Van haer martelie die sy leet van die picarden. Capitel XXIIII

Van haer martelie die sy leet van die picarden. Capitel XXIIII
Op eenen tijt sach dese maecht in haren gheesteliken uutganc een alte scoonen croen die nochtans niet en was volmaect, die si na dit leven soude ontfanghen in dat eewighe leven. Ende daer om doe si weder tot haer selven ghecomen was, bat si Onsen Lieven Heere, dat Hi haer also niet en wilde doen, dat die croone mochte worden volmaect. Op die selve tijt bat sij Onsen Lieven Heere dat Hijse wilde ontfanghen in Sine voetstappen, ende daer weder uut setten, als si daer in hadde gheweest.
Doe si hier om vierichlijcke bat ende men screef MCCCC ende XXV, quam hertoech Philips van Borgoengiën te Sciedam ontrent Sinte Geroens ende Victoers dach. Ende hi wordt daer ontfanghen tot enen regent, als hem inden anderen steden van Hollant wart ghedaen. Doe de heeren hadden gheten, dae quamen tot Liedewy somighe van des herto[230Va] ghen dieners metten cureyt van Sciedam, gheheeten her Jan Ynghel. Ende sy begonnen seer onsedelijc in haer camer te roepen ende haer te quellen. Doe dat die cureyt sach, hadde hijse gheerne bedwonghen, maer sij jaechden hem onweerdelijc van haer ende seyden, dat sy sijn cocubine ware, dat es sijn bisitte. Doe ontstaken die boeven een kerse ende haelden die gordinen op ende ontdecten Liedewy, also dat si naect lach. Dit sach ane Petronel, haers brueders dochter, ende vloech daer tusschen om Liedewy te bescermen. Maer die boeven worpense onweerdelijc jeghen die voetscamel vanden altare ende quetstense seere aen haer lendenen ende aen haer lieschen, dat si tot harrer doot toe hinkede. Daer na begonnen sij smadelike te sprekene toter heilegher maghet ende seiden, dat sij des nachts gulselijc plach te hoveren ende also oncuuschelijc te leven ende dat sij XIIII kinderen hadde ghewonnen. Ende sonderlinghe die ghene die de kerse hielt die seide, dat sy een beeste was. Hier na sloeghen sij haer handen aen haer maechdeliken lichaem ende quetsten haer also seere in drie steden dat haer dat [230Vb] bloet overvloedich liep van haren bedde daer si op lach, also datmen dat bloet met vaten moeste afsceppen. Doe ghinghen sij uut ende wieschen haer handen ende quamen weder ende gaven haer smadelike worde, als sij eerst hadden ghedaen. Doe antworde sy seer oetmoedelike ende verduldelijc ende seyde:
- ‘Hoe sijdi also coene, dat ghi aldus qualijc rekent die wonderlijke werken Gods die ghy aen my siet, ende niet en weet wat vonnesse ende ordeel u overcomen sal van Gods weghen.’
Te hants voer die hertoech van Sciedam ende die boeven die dit ghedaen hadden, voeren met hem te Rotterdam.Doe dit vernamen die heeren vanden rechte van Sciedam, doe quamen si tot Liedewy ende seyden haer, dat si den hertoghe wouden claghen ende wrake van hem eysschen. Maer si en woude gheen menschelike wrake hebben, want sij seyde dat sy swaerlike Gods wrake souden hebben, alst oec ghesciede, dat haer seere leet was. Want des selve daghes een van hem allen - die de kersse hilt ende haer vele scimpelike worde hadde ghegheven - wort inde haven voer Rotterdam onversienlic van [231Ra] een boort tot dat ander gheworpen ende waert in dat water verdroncken, ende op dat kerchof begraven. Die ander wart tot Brouwers haven in die strijt doot gheslaghen. Die derde wert te Zierixee van onversienlijcker raserie uut enen scepe in een boort gheworpen, op dat hi nyement quetsen en soude. Ende corts daer na starf hi, ende wert in die stede op dat kerchof begraven. Die vierde wert bider Sluys vander popelsye ghesleghen, dat hi niet en mochte ghespreken. Doe vraechde hem sijn knecht oft hem leet was, dat hi die maecht tot Sciedam met sinen ghesellen also qualiken ghehandelt hadde. Ende hi gaf een teeken van berou met sijnre hant ende mont, ende also sterf hij. Niet langhe daer na quam die knecht tot Liedewy ende bat haer om vergheffenesse voer sinen meester, ende sij vergaeft vriendelijc ende beweende menighen tijt, dat sy alle haestelike ghestorven waren.
Doe Liedewy van den pickaerden dit hadde gheleden, seyde haer die heileghe ynghel, dat sij overmits die onweerdelike hantieringhe die si vanden pickaerden hadde gheleden, was gheset in die voetstappen Ons Heeren, als si hadde begheert. Ende overmits [231Rb] die smadelike worde die si van hen hadde ghehoort, waren die peerlen volmaect die in haer croone ghebraken.

Daer na - doe men screef MCCCC ende XXVI bi die voerseiden hoochtijt - quam die hertoghe weder in Hollant ende een ridder van sinen heeren beval ses mannen, dat si sdaechs ende snachts souden Liedewy bewaren om te ondersoeken of die dinghen also waren diemen van haer seyde. Ende want sy anders niet en vonden van haer dan men plach te segghen.
Corts daer na wouden somighe van sinen volke te Rotterdam tot hem ontbieden her Jan Wouters soen die in dat jaer Liedewys biechtvader was gheworden, om hem te besweeren, dat hy die waerheit van haren leven soude segghen. Maer onversienlijc voer die hertoghe te Vlaenderen waert, ende daer om lieten si Liedewy ende haren confessoer met vreden.

Liedewij ziet in een visioen een kroon die nog niet volmaakt, en bidt dat ze de ontbrekende parels mag onvangen. Tijdens een bezoek van de hertog van Bourgondië beschuldigen dienaren Liedewij van oneervolle zaken en mishandelen haar. Liedewij wijst menselijke wraak af, ze stelt dat God zal straffen. De vier mannen sterven, als één van de mannen berouw toont schenkt Liedewij hem en de anderen vergiffenis. Een engel vertelt haar dat door deze zaak de kroon vervolmaakt is.

Het leven van Liedewij, de maagd van Schiedam. Ed. Ludo Jongen en Cees Schotel. 2e dr. Hilversum: Verloren, 1994

Tekst en informatie: http://www.dbnl.org/tekst/_lie002lied01_01/

Liedewy    Liedewy   

God    God   

Philips van Borgoengiën    Philips van Borgoengiën   

Sint Geroen    Sint Geroen   

Sint Victor    Sint Victor   

Jan Ynghel    Jan Ynghel   

Jan Wouters    Jan Wouters   

Lidwina    Lidwina   

Petronel    Petronel   

Sciedam    Sciedam   

Hollant    Hollant   

Rotterdam    Rotterdam   

Brouwers haven    Brouwers haven   

Sluys    Sluys   

Vlaenderen    Vlaenderen   

Zierixee    Zierixee   

Schiedam    Schiedam   

K003p    K003p   

2013-03-01 14:46:21