Hoofdtekst
Van dat beghin van haerre gheesteliker troestinge. Capitel XII
DAt beghin van deser maghet gheestelike troostinghe was die oeffeninghe der Passiën Ons Heeren Jhesu Christi ende die ontfanghenisse ende monighens des Heileghen Sacraments, Ons Heeren lichaem. Ende dat ghesciede aldus.
Want doe si drie oft vier jaer siec hadde gheweest overmits die verhinghenisse Gods, began sy by na een deel te murmerene, want si was seere belast met dier siecten die si leet, ende si hadde liever ghesont gheweest. Want si sach haer even oude maechden die tot haer quamen, starc ende ghesont van lichame. Ende daer omme docht haer dat si beter leven hadden dan sij. Ende om dese ende deser gheliker saken began si also droevich te worden ende screyde dat se niement en mochte troosten in gheenre manieren.
Doe quam tot haer her Jan Pot, haer biechtvader, ende hadse gheerne ghetroost, maer hi en mochte niet aen haer winnen. Doe riet hi haer, dat si haer vereenighen soude met den wille Gods ende oeffenen haer in Sijn Passie ende Lijden, ende leerde haer een manier hoe si dat soude doen. Ende hy seyde [222Rb] dat hij hoepte dat si die onverduldicheit wel soude verwinnen. Doe si dat hadde ghedaen ende gheen soeticheit daer in en ghevoelde, te hants warp sijt al uut harer herten. Doe bat hi ende riet haer dat si eens wat ghewelt soude doen haer selven om dat verdriet te verwinnen. Doe sij dat began te doene, began si oec om lanc also groote soeticheit daer in te smaken, dat sy seyde dat sio om een Ave Maria niet en wilde verwandelen haer siecten om ghesontheit, al haddet moghen ghescien. Ende daer om deelde si die historie van Ons Liefs Heeren Passiën in seven ghetijden, ende plachse des nachts ende des daechs over te dinckene. Ende in die ghedinckenesse ghevoelde si also groote soeticheit dat si al haren druc ende lijden vergat ende niet en ghevoelde.
Op die selve tijt doe si also onverduldich began te worden, quam die selve priester metten Heileghen Sacramente ende wildese monighen ende liet haer dat Heileghe Sacrament sien. Ende hi bat haer dat si dat neerstelijc soude aen sien ende minlijc ontfanghen ende bekennen voer waer, dattet haer God ware ende Scepper Die om haren wille mensche gheworden was ende aenden cruce ghestorven ende Die haer wel ende volcommelic soude loonen [222Va] alle die pine ende siecten die si hadde gheleden of lijden mochte. Doe si dese woorde hoorde, wortsi also seere ontsteken ende ghewont met gheestelijker minnen ende van minnen also seere weenende, dat se niemant en mochte ghepayen van weenene. Ende ghelijker wijs als si daer vore seere hadde gheweent van onverduldicheit, also lach si nu omtrent twee weken of meer endeo weende van herteliken berouwe ende minne dat si also blint ende onverduldich hadde gheweest. Ende weende also seere, dat se haer moeder noch niement anders en mochte ghetroosten, noch niement te openbaren die die sake van desen tranen ende rouwe ghesien en hadde.
Van deser tijt hadde sij voert menichwerf groote gheestelike soeticheit ende solaes, maer niet in overnatuerliker bescouwinghen. Ende als si daer in seer ende soetelic weende, en woude sij nochtan nyement segghen waeromme sij alsoe zeere screyede. Dese gheestelike ende godlijke soeticheit smakede si wel VIII jaer lanc, eer sij boven natuerliken plach te worden op getoghen tot dier hemelscher bescouwinghen.
DAt beghin van deser maghet gheestelike troostinghe was die oeffeninghe der Passiën Ons Heeren Jhesu Christi ende die ontfanghenisse ende monighens des Heileghen Sacraments, Ons Heeren lichaem. Ende dat ghesciede aldus.
Want doe si drie oft vier jaer siec hadde gheweest overmits die verhinghenisse Gods, began sy by na een deel te murmerene, want si was seere belast met dier siecten die si leet, ende si hadde liever ghesont gheweest. Want si sach haer even oude maechden die tot haer quamen, starc ende ghesont van lichame. Ende daer omme docht haer dat si beter leven hadden dan sij. Ende om dese ende deser gheliker saken began si also droevich te worden ende screyde dat se niement en mochte troosten in gheenre manieren.
Doe quam tot haer her Jan Pot, haer biechtvader, ende hadse gheerne ghetroost, maer hi en mochte niet aen haer winnen. Doe riet hi haer, dat si haer vereenighen soude met den wille Gods ende oeffenen haer in Sijn Passie ende Lijden, ende leerde haer een manier hoe si dat soude doen. Ende hy seyde [222Rb] dat hij hoepte dat si die onverduldicheit wel soude verwinnen. Doe si dat hadde ghedaen ende gheen soeticheit daer in en ghevoelde, te hants warp sijt al uut harer herten. Doe bat hi ende riet haer dat si eens wat ghewelt soude doen haer selven om dat verdriet te verwinnen. Doe sij dat began te doene, began si oec om lanc also groote soeticheit daer in te smaken, dat sy seyde dat sio om een Ave Maria niet en wilde verwandelen haer siecten om ghesontheit, al haddet moghen ghescien. Ende daer om deelde si die historie van Ons Liefs Heeren Passiën in seven ghetijden, ende plachse des nachts ende des daechs over te dinckene. Ende in die ghedinckenesse ghevoelde si also groote soeticheit dat si al haren druc ende lijden vergat ende niet en ghevoelde.
Op die selve tijt doe si also onverduldich began te worden, quam die selve priester metten Heileghen Sacramente ende wildese monighen ende liet haer dat Heileghe Sacrament sien. Ende hi bat haer dat si dat neerstelijc soude aen sien ende minlijc ontfanghen ende bekennen voer waer, dattet haer God ware ende Scepper Die om haren wille mensche gheworden was ende aenden cruce ghestorven ende Die haer wel ende volcommelic soude loonen [222Va] alle die pine ende siecten die si hadde gheleden of lijden mochte. Doe si dese woorde hoorde, wortsi also seere ontsteken ende ghewont met gheestelijker minnen ende van minnen also seere weenende, dat se niemant en mochte ghepayen van weenene. Ende ghelijker wijs als si daer vore seere hadde gheweent van onverduldicheit, also lach si nu omtrent twee weken of meer endeo weende van herteliken berouwe ende minne dat si also blint ende onverduldich hadde gheweest. Ende weende also seere, dat se haer moeder noch niement anders en mochte ghetroosten, noch niement te openbaren die die sake van desen tranen ende rouwe ghesien en hadde.
Van deser tijt hadde sij voert menichwerf groote gheestelike soeticheit ende solaes, maer niet in overnatuerliker bescouwinghen. Ende als si daer in seer ende soetelic weende, en woude sij nochtan nyement segghen waeromme sij alsoe zeere screyede. Dese gheestelike ende godlijke soeticheit smakede si wel VIII jaer lanc, eer sij boven natuerliken plach te worden op getoghen tot dier hemelscher bescouwinghen.
Beschrijving
Hoe Liedewij het geduld ontwikkelt om met haar ziekte om te gaan.
Bron
Het leven van Liedewij, de maagd van Schiedam. Ed. Ludo Jongen en Cees Schotel. 2e dr. Hilversum: Verloren, 1994
Commentaar
Tekst en informatie: http://www.dbnl.org/tekst/_lie002lied01_01/
Naam Overig in Tekst
Ave Maria
Ave Maria 
Jezus Christus
Jezus Christus
God
God
Jan Pot
Jan Pot
Lidwina
Lidwina
Plaats van Handelen
Schiedam
Schiedam
Kloekenummer in tekst
K003p
K003p
Datum Invoer
2013-03-01 14:46:21