ENGELB_02_006

Wie han'n n kalf vôtbracht nao Aotmöske hen, 'n jeurig kalf, nao een van de Jöd'n, dat weet ik nich, mè in elk geval wie hebt vôtbracht nao Aotmöske; wie kwam'm gewoon owwe 't knaal langs 'n Aotmöskediek en wie wan'n teng 'n Wäöstmös owwe, Wäöstmös wes wa woa den vrowe leng hef, nen groot'n mös, wie jag'n der ja schaats'n ôp anne joar'n en doa kwam inèèns en het was bie de zommedag in 't vuurjoa en doa kwam inèèns kaant nen gläönige keal langs mie loop'n, nich en doa stun'n wie nao hen kiek'n en doe zeg de va, ja, de ole mèèste Plecht har vrowe wa es zegd: dat wan'n zogenaamd van die damp'n, die der ôptök'n oet de lèègt'n, at warmer en beter wea wörd'n, dee wan'n gläönig, nich, en dat heb ik doa ok maol zein en dat he'k ok met ouns vare metmaakt, nich, wie kwam'm maol oet de Rossume mei en doa lag ne pöppel en dee har meschien a wa tien joa umleng en die gleuit ok; pöppel'n hoolt wil gleui'n; doa staot ik in met 'n kloomp, he zeg: staot doa mè in met 'n kloump teng mie en ik staot doa in met 'n kloump en doe glein 't al um mie hen, want pöppel'nhoolt wil inderdaad gleui'n; meschien hes zölm wa es metmaakt. Dat heb ik doa ok wa zein en doe ool Laoke-Toon zien hoes zet is doa is ja nô nen heel'n anne ôp-doa hef den Kaamphoes ôpwest, wees wa, - doa zin ik 's nachens met 'm köm'm oet Olnzel, doe ha'w vuur mèèste Plecht kalwe haald, doe har mèèste Plecht nog de wèèn'n, woa nô Verduyn wount en doa ha'w kalwe haald, mè doe was 't ônwies wëa - 't was ok in 't vuurjoa, dee kalwe wan'n van Bodegraam'm met 'n trein köm'm, 't was in 'n vurigen oarlog, dee kô'w 's nachens nich metnem'm - doe was ool Laoke Toon zien hoes in anbouw en doa hung nen pepier'n cementzak, mè doe ken'n wie nog gen pepier'n cementzak, ouns vare ok nich en die zat ôp nen bôs in Bôs zien vèèld, mè doe gung ouns vare ok vedan, mè doe wie 'n hônned tred vuurbie wan'n, doe nam he mie bie de haand en doe was ik in elk geval wa 'n joa of veatèèn vieftèèn, doe zeg he: kôm an, jông, a'j loop'n gaot, dan zeg ie, ik hebt 'n spook zein, wie gaot wierum henkiek'n en doe gung wie wierum henkiek'n en doe han'n die messeles of timmeleu of die leu dan nen potlane of nen pepier'n potlanezak loströk'n en die han'n ze ôp nen bôs zet en die beweeng zik met de weind en het was net of der nen keal stun in 't vèèld, dat was bie ool Laoke-Toon zien hoes.
Ik: "Zao könt ze heel vaak zean an bäöm'm, at ze zik beweegt of zie hebt ne gestalte van 'n mèènske ..
[OH:] Ja en duur de weind beweegt ze zik, wees wa, zachjes, ik kräöp mien vaar zaowat in de bôks'npiep; ik zei: doa stèèt ok nog nen keal, doe wa'w der vebie, doe zeg he: Kom an, jông, wie möt kiek'n, wat is, want annes drèèit ôp 'n spook'n oet en doe'w der bie kwam was ne bôs met nen pepier'n potlane cemèènt'n toet'n.

SINSAG 0310 - Andere Erscheinungen von Weissen Frauen    SINSAG 0310 - Andere Erscheinungen von Weissen Frauen   

Populierhout gloeit bij goed weer. Een papieren zak wordt voor een spook aangezien.

Collectie Engelbertink, verslag 2, verhaal 6 (Archief Meertens Instituut)

Ootmarsum    Ootmarsum