ENGELB_04_004

H: Ik heb vrower in miene jôngsjoarn dree joar bie Diekboer west, wat nô Wesselink is, en ja, doe was de boer en de vrouw van middelmaotige laeftied in dee tied, mer d'r was ok nog ne ole tante in 't hoes, jao den was doe 'n zömtig joar za'k mer zegng, en Diekboer, den har d'r 'n honerhôk staon, doar kort ôp de Schreur an en doe môs ik doar hen en eier oethaaln en dat was nog wa nen heeln aend en in dee tied, woar nô Leefrink Jantje wount, was dat almaol nog hoolt en woestenij en doar lööp ik - 't Schipkn neumn ze dat - doar lööp ik duur en doe môs ik - het is doar aolmaol veranderd - bie 't ool Weanink langs, dat was doar bie Leferman in de buurt en nô ja ik haaln de eier d'r oet - het was inmiddels a luk dounker wörn - en doe kôm ik doar wier dezölfde weg langs - doar gung zonne stei tuske twee wel hen - en ok nich a'k nô zaozear bang was, doe begun ik ineens zao raar te wörn, net of ik flauw wör, nô ja ik gung nog wa naor 't hoes, ik kom in hoes en doe zeg dat ole maenske, dee ole tante: "Jöwnkn, wat zös d'r ja oet, kiks net zao wit oet". Ja good, ik môs naor ber hen, ik wol ok niks te etn, zie woln mie nog wat te etn doon, mer ik har 'n anweisel krengn.
E: Wat is dat dan 'n anweisel?
H: Ja, wat is dat dan zon anweisel, ja dat weit oe zao an, zer dat ole maenske, 'n anweisel.
E: Har dan dan naerngs wat met te maakn?
H: Nee, dat har naerngs, nee doar har ne heks loopn, mer ik heb nich zeen, mer ik har 'n anweisel krengn, nô good, ik môs naor ber hen, mer dee ole tante, dee koump bie mie doe ik 'n zetke in ber har lengn en zer, hoe is 't? Ik zer: "Ja nog wa 'n luk keulerig, 'n luk rillerig". Ik heb aans nog wa ne rao kluur, mer ik was doe krietwit zenn ze doe tengn mie. En doe zer dat maenske:"Ik zal die wa luk haaln". En dat gung weg, koump wier en dat haalt 'n köpke vôl water. Ik zer: "Wat is dat ja raar water?" Ja dat was wijwater, zon vast gelaof hann ze doe an wijwater en as dat ôpdreinks, dan zeins monvroo wier better. En dat he'k ôpdruinkn, ja hoe oold was ik, zon joar of 13, 14 en dan lööw ie alns wa en ik was 's annesmaorngs wier better. Dat hef wa hölpn. Wus ik wa, zeg dee vrouw, dan is dat wa wier owwer, doar hef ne heks loopn en dat har mie dat anpoest.

TM 3101 - Heks maakt kind (mens, dier) ziek    TM 3101 - Heks maakt kind (mens, dier) ziek   

TM 3106 - Het drankje van de duivelbanner    TM 3106 - Het drankje van de duivelbanner   

Heks veroorzaakt koortslip bij jongen, na drinken van wijwater genezing.

Collectie Engelbertink, verslag 4, verhaal 4 (Archief Meertens Instituut)

G263.4 - Witch causes sickness.    G263.4 - Witch causes sickness.   

G271.2.2 - Witch exorcised by holy water.    G271.2.2 - Witch exorcised by holy water.   

Diekboer    Diekboer