KROSENBRINK00802

In Halle had der zich ok is ene opehongene. En de leu konnen in hoes ok neet mear wezzen. Ut ging der monges hear. Ton bunt ze naor de paoters in Harreveld egaone, hoowal ze Protestant wazzen, umme daor raod te vraogen. Daor zean ze eur, dat zee neet helpen konnen. Maor zaoterdag zollen ze maor naor Reurle hen gaon. Met den trein van twee uur kwam der ne man an en den kon eurleu wal helpen. Zee wisten joo gaar neet wel ut was, maor ton ze daor kwammen, stappen der ne paoter oet den trein en den vroog: Wol i’j mi’j ophalen? Zee gingen naor hoes hen. Zee wazzen der kort bi’j en ton zea den paoter: A’k noo op owwe grond bunne, dan mo’j ut mi’j zeggen. Maor hee was al een perseel veurbi’j. Dat was ik al gewaar ewordene, was ut antwaord van den paoter. Zee kwammen in hoes en ton zea den paoter, dat ze alle vensters los mosten doon. Dat deen ze, maor den paoter zea: I’j heb ter nog ene vergeaten. En dat kloppen ok, want der zat ter ok nog ene an ut achterende van den gevvel. Noo mo’j allemaole onder den bozem gaon staon. Maor good der onder. Maor den boer stok der met de scholder nog un endjen onderhen. Ton ging den paoter an ut wark. Daor kwam un gearoste in hoes en den boer kreeg ne slag op zienen scholder, dat e den veartien dage lam hadde. Maor nao den tied hebt ze noojt gin las mear ehad.

In Halle heeft ook iemand zich opgehangen. Men kon niet meer in dat huis zijn. Toen zijn ze voor advies naar de paters in Harreveld gegaan, terwijl ze protestant waren. De paters konden niet helpen. In Ruurlo was een pater die wel kon helpen. De pater zei dat ze het moesten zeggen als hij bij het huis was, maar hij was al te ver. In het huis zei de pater dat ze alle ramen open moesten doen. Ze waren het raam achter de gevel vergeten. Toen moest iedereen goed onder de schoorsteen gaan staan, maar de boer stak er met zijn schouder uit. De pater ging aan het werk en de boer kreeg een klap op zijn schouder, waar hij nog twee weken last van had. Maar daarna hebben ze geen last meer gehad.

Corpus Krosenbrink, verslag 8, verhaal 1 (archief Meertens Instituut)

Halle, Ruurlo, Harreveld    Halle, Ruurlo, Harreveld