VRIES002802 - DE BOERDERIJ VAN BRAM KOSTER (bij Schapenbout, gem. Axel).

DE BOERDERIJ VAN BRAM KOSTER (bij Schapenbout, gem. Axel).

Da bie Bram Koster onder Schapenbout is t 'er ook zo 't een en ander gebeurt.
Z 'aaden daar een 1e knecht, Krien (H)amelink.
Da was een ele hoeie knecht; nooit versliep tie z 'n eigen in nooit kwam tie te late op z 'n werk. On een avond in de zomer gieng tie naar een feeste in Axel; vuurwerk was ter ook bie.
Da kreeg tie saves kennis an Ale deVister (deVisser!), die weunden op de Magrette (tussen Axel en Zoutespui).
Ie brocht ze thuus in voodat ie weggieng bleven ze nog een tochtje vô 't hekken staan praten.
't Was al één ure toen a tie weggieng in omdat ie a vroeg op de stee most sien docht ie: 'k gaan me ma wad an den diek leggen. Want ie weunden op Spuie in 't was de moeite nie meer om na bed te gaan.
Maar ie gerocht toch in slape en toen die wakker wier docht ie: 'k gaan ma vast na de stee.
Een bitje later - 't wier à lichte, komt ie een kennis, Levien Putter, tegen.
Wa moe jie na toe? zeg Levien tegen um.
Ë na de stee van eigen! (natuurlijk)
"Ma Krien, dan loop je toch glad mis man, jie bin op weg na Spuie!"
"Da snap ik niks van", zegt Krien in zonder meer keert ie terug, op weg na de stee van Koster.
A tie daar ankomt is 't Ouwe Daantje deFeijter à bezig mee voeren.
"Was da noe?" zegt Krien, das nog nooit gebeurt dak te late was."
Das waar zegt Daantje in weet je noe Krien, wa - k zo gek vinnen?
Den baas zei gisterenavond à tegen me:
"Daan, begin jie mergen maar à mee voeren, want Krien is toch te late!"
"Je begriep zeker wè, meneer, da Bram Koster da d 'and in ghad eit, want daar in de buurte wisten z 'allema, dat t 'er op de stee van Koster soms rare diengen gebeurden.
M 'en schoonvader, Marien Zegers ei me da wel is wad over verteld.
Ie was een beroepsvisser in visten nogal is op de leiding die vôbie de stee van Koster loopt.
Dan gebeurden het soms zei-die, dat snachts de bômen op de weie van Koster zweepten in bogen asof 't een arde sturm was in vèderop was 't alles wée stille.
Den ouwen Jacob Geensen, die op de Sassing (Axelse Sassing) weunden gieng op een nacht is vobie Koster en toen à tie over een stepsel (een soort van overstap langs een voetpad), stond da een vrouwe, elegans (geheel) in 't zwart gekleed zonder (h)oofd. Ze zei niks, maa Jacob was 't er elema van ontdaan!
Da moe nog wè meer gebeurt sien, mà da weet ik noe toch nie meer an mekare te knôpen.

SINSAG 0667 - Zauberer führt irre.    SINSAG 0667 - Zauberer führt irre.   

SINSAG 0750 - Andere Zauberei.    SINSAG 0750 - Andere Zauberei.   

SINSAG 0310 - Andere Erscheinungen von Weissen Frauen    SINSAG 0310 - Andere Erscheinungen von Weissen Frauen   

Tovenaar laat man verdwalen, laat bomen zwiepen; zien van in het zwart geklede vrouw zonder hoofd.

Collectie De Vries, verslag 28, verhaal 2 (Archief Meertens Instituut)

Bram Koster    Bram Koster   

Krien Hamelink    Krien Hamelink   

Ale de Vister    Ale de Vister   

Ale de Visser    Ale de Visser   

Marien Zegers    Marien Zegers   

Schapenbout    Schapenbout   

Axel    Axel   

Magrette    Magrette   

Zoutespui    Zoutespui