VRIES004302 - DE BLAUWE SCHIMMEL.

DE BLAUWE SCHIMMEL.

Bie boer Dierinckx, dà was een schapenboer, die weunden an de Schoindiekse strate (Schoondijkse straat) en die aad een duitse schaap(h)erder. Die gieng geregeld de schapen wei-jen langs de dieken.
Die kwam een keer bie de wei-e van vanKruuningen en ie docht: sie, daa sta zovee lekker 't eten op de wei-e van vanKruuningen en die "gooiden" de schapen daarin.
Baas vanKruuningen die zag tà en die stierden de knecht d 'er op af. De schaper die zei: "dan moet de baas zelf maa kommen!"
De baas kwam en die zei: "waa bin die schapen?", want die zag ter geen.
De schaap(h)erder zei: "Daa bin geen schapen baas, daa bin niks as mols(h)ôpen." En waarachtig, de baas zag niks as mols(h)ôpen.
't Was op een anderen avend en de schaper was mee z 'n schaapjes thuus.
Ie zat bie-t "convent" 2) saves wà te luchten.
Toen kwam ter één van de knechs een praatje maken.
De schaper zei: "Men moeder verjaar vandaag, jongen, ga je mee na Duitsland?"
De knecht docht: "(H)oe moek daa kommen?"
De schaper zei: "Ga je maa gauw gaan ànklejen."
À te knecht trugkomt zegt de schaper: "Kiek à maar achter 't convent of-ter niks staat."
Eest zag tie niks, maa toen liep tie tegen een blauwe schimmel àn, die daarachter stieng.
Toen zei de schaper: "jie zeg geen woord, dienkt ter om, maar ak zeg: "bij", dan sprieng je d 'er bie."
De schaper klom op de schimmel en zei: "bij". De knecht sprong ter bie en ze waren weg. Een poôsje later, meschien een kwartier, zeg de schaper: "Moeder is an 't koeken bakken, 'k ruuken ut!"
Ze kommen op de grond en ze spriengen d 'er af en naa binnen.
Vasself eest moeder gefeliciteerd. "Enk et je nie gezeid, dà z àn 't koeken bakken was" zei de schaper. En zudder lekker koeken eten!
Alles was zo 'n bitje vôbie, ze konnen daa nie bluuven. 't Was awee van 't zelfde: de knecht mocht wee niks zeggen en zo kwamen ze snachs trug op de wei-e.
Den anderen avend zegt de schaper tegen de knecht: "(H)oe ist bevallen?"
"Ja, goeit," zegt de knecht, maa toen à me weggerejen waren kreeg ik een poôsje later toch zo 'n schok!"
Toen zei de schaper: "Me waren een bitje te laag, want 't pèrd stootten z 'n pootjes tegen de Lieve Vrouwentoren van Antwerpen!"
"Ga je nog is mee?" vroeg de schaper. Maa de knecht ei-t nooit meer angedurfd.

[noot 2): Convent = couvent - klooster, hier bedoeld een klein houten gebouwtje op het erf naast de schuur, waar de schaper (ook wel de knecht) sliep.]

SINSAG 0690 - Fahrt durch die Luft    SINSAG 0690 - Fahrt durch die Luft   

SINSAG 0750 - Andere Zauberei.    SINSAG 0750 - Andere Zauberei.   

Tovenaar verandert schapen in molshopen; vliegt met schimmel, raakt onderweg kerktoren.

Collectie De Vries, verslag 43, verhaal 2 (Archief Meertens Instituut)

Dierinckx    Dierinckx   

Schoindiekse    Schoindiekse   

Schoondijkse    Schoondijkse   

van Kruuningen    van Kruuningen   

Duitsland    Duitsland   

Lieve Vrouwentoren    Lieve Vrouwentoren   

Antwerpen    Antwerpen