VRIES005001

'k Was nog jonk en 'k aa mee een vriendinne van me boodschappen gedaan in Terneuzen op "'t Diekje" (Dijkstraat).
Toen à me klaa waren giengen me mee onze fiets an d '(h)and vobie 't café van Wieckhorst.
Dà was een Duitser, j 'ei-t-em nog wè gekend zeker?
Een neef van mien, Jan Schieman, die weunden onder Philippine, die kwam mee z 'n kameraad Jaap Dieleman net naa buuten.
Ze dejen allebei een bitje raar, maa ze waren toch nie zat.
Later mosten me vô de brugge wachten bie Notebaert, dà was vroeger d '(H)oekse brugge, dà weet-je wè.
En daa kwamen die jongers ook mee udder fiets en Jaap gieng mee z 'en fiets tegen den mienen staan.
Op Jaap z 'n fiets zat een nist mee jonge verkes.
(H)oor z 'is knorren zei Jaap, maa wieder oorden niks.
En bie Jan zat een (h)oender mee kiekens op 't stuur en men-oorden dad (h)oender kakelen.
'k Docht: "oe kan dà noe!"
Jie ei zeker wad in je zak zitten zei 'k nog.
Toen amme de brugge over waren konnen z 'op udder fiets ost (haast) nie vooruut kommen en wieder bleven d 'er achter riejen, want me waren een bitje bange.
Bie Keesje Bakker op den (H)oek, die aad een cafétje, giengen ze binnen.
Toen as ze d 'er uut kwamen was 't nog nie over.
Bie 't Mauritsfort, bie van Opdorp 1) èn z 'udder fiets geslogen dat de stukken d 'er af vlogen.
Wat 't gewist is, dà wisten z 'op dad oogenblik nie, maa later begrepen ze 't wè!
Bie Wieckhorst zat-ter eene uut de buurte van de Lovenpolder en die stong der om bekend, dat tie de "Zwarte Kunst" kon.
En zelf enk dien avend ook wà beleefd en dà kwam, omdà Jaap mee zien fiets tegen den mienen angestaan aa.
'k Most nog naa buuten naa de W.C. en toen liep ter een (h)ondje vobie, da 'k nooit gezien aa.
Toen ak daa binnen zat zag ik deuj de kiere van de deure dà beestje altied maa grooter (h)ooren. (worden)
Die stak z 'n poot deuj de kiere en ik wier bange.
Mee een stokje dat-ta lei sloeg ik em op z 'n poot, maa dien (h)ond bleef zitten.
Toen ak er uut kwam liep tie om de regenbak en inees was tie verdwenen.
Maa den anderen dag zei degenen die à 't gedaan aa (z 'n naam weet ik wè, maa je moet tem maa nie opschrieven) dat-tie zo 'n piene an zen èrm aa, want datter iemand (h)ard op geslogen aa!
1) gehucht aan de oude hoofdweg Hoek-Philippine.

SINSAG 0580 - Andere Hexenkünste    SINSAG 0580 - Andere Hexenkünste   

SINSAG 0750 - Andere Zauberei.    SINSAG 0750 - Andere Zauberei.   

SINSAG 0640 - Hexentier verwundet: Frau zeigt am folgenden Tag Malzeichen.    SINSAG 0640 - Hexentier verwundet: Frau zeigt am folgenden Tag Malzeichen.   

Betoveren van mannen en daarmee van hun fietsen; langslopen van onbende hond die steeds groter wordt, na slaan van hond klaagt man dat zijn arm zeer doet.

Collectie De Vries, verslag 50, verhaal 1 (Archief Meertens Instituut)

Wieckhorst    Wieckhorst   

Jan Schieman    Jan Schieman   

Jaap Dieleman    Jaap Dieleman   

Lovenpolder    Lovenpolder   

Terneuzen    Terneuzen   

Philippine    Philippine   

Hoek    Hoek   

Mauritsfort    Mauritsfort