Hoofdtekst
De Zusterkerk
Veur joaren wazzen der drij zusters, dij van iedelhaaid gain road wozzen. Ze wazzen jonk en knap, gain mooier in 't haile laand tussen Zòltkaamp en Delfsiel. Ze huvven 't naarns om te loaten, van ze wazzen riek, en van de alderhoogste oadel. Kwoad veur de mìnsken wazzen ze nait, mor ze wazzen kwoad veur heur zulf, omdat ze nooit ter om dòchten, woar dat ze belanden zollen, as heur tied ter heer was. Ze dòchten ja allain mor om gekhaaid en wereldse dingen.
Op 'n dag luipen ze aan de kaant van de zee, en doar kwam 'n hail mooi bootje aandrieven. Ze sprongen der in, dat was veuls te mooi. Gevoar zaggen ze ja nooit, en dou haildal nait, mit dat stille weer: gain wachtjes op 't wotter te zain.
In 'n ogenblik binnen ze midden op de wiede zee, en nòg begriepen ze 't nait. Ain zegt: wie goan weerom, wichter! wie drieven veuls te wied.
Dou kwam de störm op; nou kwam de vrees; nou kwam de inkeer. Nou haren ze 't begrepen! Ze ruipen Gòd aan in heur nood, en beedden op heur knijen, en beloofden beterschop van leven, às ze mor weer aan laand komen moggen. Nòg wör 't wilder, en nòg gongen de wagels hoger. 't Was nòg nait genog. In 't daipste van heur ielìnne beloofden ze, dat ze 'n mooie kerk baauwen zollen op 't stee doar ze aan laand kwammen.
Dou kwam der oetkomst in de benaauwhaid. De wind gong liggen, 't bootje dreef aan waal op 'n plek, doar doudestieds niks stonden as wat viskershutten. Doar hebben ze 'n kerk zetten loaten, net zo mooi as in dij veurege tieden de meugelkhaaid was. Dat is de kerk van Olhoof mit zien òlle, hoge, swoare toren.
De beelden van de drij zusters zitten in de dikke muur mezzeld: mor nait as 'n nij bewies van heur iedelhaaid. Doarom zitten ze hoog in de muur, nòg boven de klòk. Mor tòt 'n aiwege gedachtenis.
Veur joaren wazzen der drij zusters, dij van iedelhaaid gain road wozzen. Ze wazzen jonk en knap, gain mooier in 't haile laand tussen Zòltkaamp en Delfsiel. Ze huvven 't naarns om te loaten, van ze wazzen riek, en van de alderhoogste oadel. Kwoad veur de mìnsken wazzen ze nait, mor ze wazzen kwoad veur heur zulf, omdat ze nooit ter om dòchten, woar dat ze belanden zollen, as heur tied ter heer was. Ze dòchten ja allain mor om gekhaaid en wereldse dingen.
Op 'n dag luipen ze aan de kaant van de zee, en doar kwam 'n hail mooi bootje aandrieven. Ze sprongen der in, dat was veuls te mooi. Gevoar zaggen ze ja nooit, en dou haildal nait, mit dat stille weer: gain wachtjes op 't wotter te zain.
In 'n ogenblik binnen ze midden op de wiede zee, en nòg begriepen ze 't nait. Ain zegt: wie goan weerom, wichter! wie drieven veuls te wied.
Dou kwam de störm op; nou kwam de vrees; nou kwam de inkeer. Nou haren ze 't begrepen! Ze ruipen Gòd aan in heur nood, en beedden op heur knijen, en beloofden beterschop van leven, às ze mor weer aan laand komen moggen. Nòg wör 't wilder, en nòg gongen de wagels hoger. 't Was nòg nait genog. In 't daipste van heur ielìnne beloofden ze, dat ze 'n mooie kerk baauwen zollen op 't stee doar ze aan laand kwammen.
Dou kwam der oetkomst in de benaauwhaid. De wind gong liggen, 't bootje dreef aan waal op 'n plek, doar doudestieds niks stonden as wat viskershutten. Doar hebben ze 'n kerk zetten loaten, net zo mooi as in dij veurege tieden de meugelkhaaid was. Dat is de kerk van Olhoof mit zien òlle, hoge, swoare toren.
De beelden van de drij zusters zitten in de dikke muur mezzeld: mor nait as 'n nij bewies van heur iedelhaaid. Doarom zitten ze hoog in de muur, nòg boven de klòk. Mor tòt 'n aiwege gedachtenis.
Onderwerp
SINSAG 1022 - Schwesterkirchen.
SINSAG 1022 - Schwesterkirchen. 
Beschrijving
Twee zussen waren heel ijdel. Op een dag kwam er een bootje langs drijven en ze sprongen erin. Toen er storm kwam midden op zee, kregen de zussen spijt. Ze beloofden God een kerk te bouwen op de plek waar ze aan land zouden komen. Dit hebben ze gedaan.
Bron
Laan, K. ter. Groninger overleveringen. Zutphen, 1930. p. 104
Commentaar
1930
Schwesterkirchen.
Naam Overig in Tekst
Zusterker
Zusterker
Zòltkaamp
Zòltkaamp
Delfsiel
Delfsiel
God
God
Naam Locatie in Tekst
Delfzijl
Delfzijl
Gòd.
Gòd.
Datum Invoer
2013-03-01 14:46:20