WEV012802

Wel mit de helm beboorn was, har altied geluk.
Hai hof nait in dainst en zien zoakn gongen ook goud.
Ie heurn nou nooit meer van mit de helm beboorn, omdat dat ding nou votdoadelk weg doan wordt deur verpleegsters en zo.
Vrouger wur e opbaargd.
Zo ain kon ook begravvenisn zain van te veurn.
Lichtgeleuvig bin ik nait, moar dat er veurloop bestait leuf ik wel. Door hebben ie de honden bieveurbeeld.
Op de Hörsten heb ik door op let. Was n jonge vent zaik en toun kwam dr n hond - wie zegn mit vaar oogn, hai het vlekjes boovn d oogn - hail van Muzzelknoal en gung zitn te jankn veur t huus van de zaike. De jonge man is best overleden; en de hond heb k nooit weer zain. k Wil doorom ook nait zo n daier hebben.
Ik heb dr n beetje schrik veur kreegn.
Moar ja, vrouger, toun was men overal benauwd veur.
Hier spookde t en door deugde t nait, dat was t proatje van oale mensn.
Mien oal heer zag ook voak spookn.
Ik wait nog, dat hai n keer teegm mien bruier en mie zee:
"Doar bie t huus van Bos deugt t nait, ik zai aal moar lichies zweevn achter t huus."
Dat was ja gevoarlijk, want al meer har hai schimmen zweevn zain of n huus in brand en noaderhand was dr n dode komen.
Nou was Bos aan de beurt.
Ik zee: "Wie goan dr op of."
d Oale gung zulf mit, moar baange was e wel.
En joa, was n beweegn van licht te zain bie Bos, moar wat was t geval? Bos luip over dele mit n schienvat, omdat hai eevn uut de boksm mos; de voldeure zatn grode goatn in en door scheent licht deur; mien voar was toun gerust, moar biegeleuvig is e altied bleven, mensn komen dr nait makkelk of.
"Spot nooit mit de duvel jonges", zee hai teegn ons, "Jan P. dee dat vrouger as opschootn jong ook; moar op n keer is hai zomoar biezied smeetn over de sloot."
Ja, dei duvel. Op Klontjebuurt (Ter Apelkanaal, F.W.) is es n keer aine vermoord op de weg. Op dat stee was t slim gevoarlijk. Wel doar s nachts tusn 12 en 1 uur mit peerd en woagn langs kwam, mos dr op reekn, dat t peerd stokstief stoan bleef op dei plek. En den was dr moar ain middel om weer vot te komen. Ie mozzen n spaike stukn houwn van t rad, den gung t weer wieder; den harn ie zogezegd de dode, dei dr misschien ook terugge was, dood houwd. Verschaiden peremenners gungen mit n boge om dat stee hen en den gebeurde dr niks; allaind as ie dr liekover reden.

Mien oln hebben mie dit aal verteld.

SINSAG 0489 - Das zweite Gesicht    SINSAG 0489 - Das zweite Gesicht   

TM 4905 - Dwaallichten (stalkaarsen)    TM 4905 - Dwaallichten (stalkaarsen)   

Helmdragers; jankende hond, zien van zwevende lichtjes en brandend huis zijn voorteken van sterfgeval; spotten met duivel; vastzetten door duivel, manier om los te raken.

Collectie Wever, verslag 128, verhaal 2 (Archief Meertens Instituut)

Bos    Bos   

Jan P.    Jan P.   

Klontjebuurt    Klontjebuurt   

Horsten    Horsten   

Musselkanaal    Musselkanaal   

Ter Apelkanaal    Ter Apelkanaal   

De Hörsten    De Hörsten   

Muzzelknoal    Muzzelknoal   

Horsten    Horsten   

Ter Apelkanaal    Ter Apelkanaal   

C192p    C192p   

G037a    G037a