MVS003 - Vanden beghin haerre siecten ende haer drie eerste jaeren daer aen. Ende daer in een manslacht bi haer ghehindert wort. Capitel III

Vanden beghin haerre siecten ende haer drie eerste jaeren daer aen. Ende daer in een manslacht bi haer ghehindert wort. Capitel III
ONse Lieve Heere verhoorde haer ghebet ende visenteerde se met eenre onsprekeliker siecten, dat sij vleeschelijc allen menschen daer mede onminlijc wert ende Gode alleene minlic. Want doen sij opt leste was van haren XV jaren, soe [218Ra] ghinc si op scoloedsen met haer evenoude maechden op dijs spelen omtrent Onser Vrouwen Lichtmesse. Ende daer quam een van haren ghespelinnen rijdende op dat ijs ende sij gheraecte haestelic Liedewy also, dat Liedewy viel op eenen hoep scossen van ijse ende brac een corte rebbe in haer rechte sijde. Ende cort daer na so ghecreech sij bijder selver side een groote aposteem datmen met gheenre manieren der medecinen en mochte ghenesen, alst oec voersproken hadde meester Andries, medicus van Delft.
Daerna op Sent Jans avont in midden den somer in haer XVI jaer, quam haer vader by haer sitten om haer te troosten. Maer Liedwy, van grooter last der siecten die sij leet, so vloech sij vander stede daer sij lach ende viel op haers vader knyën. Ende te hants barst die aposteeme ende die vuulnesse die daer uutliep, keerde sij te monde uut ende was van dien keeren also cranc gheworden, datmense voer doot hielt.
Van deser tijt was sij voert sonder aflaten also siec, dat sij in tween jaren op die hoochtijt van Paeschen om dat Heileghe Sacrament te ontfanghen [218Rb] ter kerken woert gheleit of ghedraghen. Ende in die yerste drie jaren plach sij cranckelijc te gaen sonder stoc of met eenen stoc crupende, ende met enen stockelken somwile te comen op die grachte ende daer te drincken vuul water, ende somwile biden viere, als daer water in eenen ketel warmde, ende dranc daer af na haren lust. Ende dat gaf sij te hants weder over. Ende aldus nam sij haer voetsel.

Binnen desen drie jaren ghevielt, dat een man met eenen blooten messe in tornighen moede eenen anderen man vervolchde. Ende hij vraechde Peternellen, Liedewijs moeder, of hij daer in ghecomen waere. Peternelle seide:
- ‘Neen, hij’, want sij woude des mans lijf bescudden. Doe ghinc hij in Liedwys camer ende vraechde haer, of hij daer in ghecomen ware. Ende Liedwy seide:
- ‘Ja, hi.’
Doe wert haer moeder tornich ende gaf haer enen kinnebacslach, want si hadde anxt, dat die man soude van den anderen doot gheslaghen worden. Doe seide Liedwy, dat sij daer om de warheit seide, want sij hoepte dat die waerheit den man bedecken soude, alst oec ghesciede. Want die man die daer in gheloopen was, stont voer [218Va] des anders mans ooghen, ende hi en wort van hem niet ghesien. Doen dat de moeder hoorde ende sach, soe lovedese Gode ende dancte Onsen Heere ende prijsde harer dochter gheloove, want sij sach, dat also groot quaet met eenen teeken der waerheit benomen ende ghehindert wort.

Lidwina wordt ziek, valt als ze aan het schaatsen en breekt een rib. Daarna krijgt ze gezwel dat niet wil genezen. Hoe ze op haar ziekbed een moord voorkomt.

Het leven van Liedewij, de maagd van Schiedam. Ed. Ludo Jongen en Cees Schotel. 2e dr. Hilversum: Verloren, 1994

Tekst en informatie: http://www.dbnl.org/tekst/_lie002lied01_01/

Onze Lieve Heer    Onze Lieve Heer   

God    God   

Andries    Andries   

Onze Lieve Vrouwe Lichtmis    Onze Lieve Vrouwe Lichtmis   

Liedewy    Liedewy   

Liedwy    Liedwy   

St. Jan    St. Jan   

Pasen    Pasen   

Peternelle    Peternelle   

Onze Heer    Onze Heer   

Delft    Delft   

Schiedam    Schiedam   

K003p    K003p   

2013-03-01 14:46:21